जीतपुरसिमरामा गठबन्धनको निर्णय नस्वीकार्ने कांग्रेस नेताको घोषणा

सिमरा : नेपाली कांग्रेसले जीतपुरसिमरा उपमहानगरपालिकामा केन्द्रीय गठबन्धनको निर्णय नस्वीकार्ने भएको छ । केन्द्रीय गठबन्धनले प्रमुख पद नेकपा माओवादी केन्द्रलाई दिने निर्णय गरेपछि कांग्रेसले उक्त निर्णय अस्वीकार गर्ने बताएको हो।

केन्द्रीय गठबन्धनबीच भएको भागबण्डामा जीतपुरसिमराको प्रमुख पद माओवादी र उपप्रमुख पद कांग्रेसलाई दिने गरी सहमति भएको थियो । गठबन्धनबीच भएको भागबण्डाको निर्णय बाहिर आएपछि कांग्रेसले नगरस्तरीय बैठक बोलाएर दुवै पदमा एक्लै प्रतिस्पर्धा गर्ने निर्णय गरेको हो । 

गठबन्धनको निर्णय पर्खेर बसेको कांग्रेसले अन्ततः उपमहानगरपालिकाको प्रमुख र उपप्रमुख पदको आकांक्षीको नाम सिफारिस गरेको छ। कांग्रेस नगर समितिको बैठकले प्रमुखमा ११ र उपप्रमुखमा १३ जनाको नाम सिफारिस  गरेको हो । प्रमुख पदका लागि श्यामबाबु गुप्ता, कृष्णवर्त सिंह, नारायणी रायमाझी, शोभाकर पराजुली, ओमकृष्ण कार्की, सुमनकुमार भट्टराई, टिकाराम पौडेल, माधव उपाध्याय, रुद्र पौडेल, देवेन्द्र उपाध्याय र गंगा काफ्ले आकांक्षी देखिएका छन् । 

यसैगरी उपप्रमुख पदका लागि गिता शर्मा, राधादेवी साह, मेघा शाही, रिता रिजाल, रामबाबु गुप्ता, छविलाल शर्मा, रेशम तिवारी, शरदचन्द्र भट्टराई, राजमणि बराल र श्यामबाबु सिंह भूमिहारले दावी गरेका छन् । दुवै पदमा दावी गरेका सबैको नाम सिफारिस गर्ने निर्णय भएको नगर सभापति छविलाल शर्माले जानकारी दिए । 

उनले केन्द्रीय गठबन्धनको निर्णय अमान्य रहेको र कांग्रेसले दुवै पदमा एक्लै प्रतिस्पर्धा गर्ने बताए । 'हामीलाई गठबन्धनको निर्णय स्वीकार्य छैन्, हामी एक्लै चुनाव लड्न सक्षम छौं, शर्माले भने,'त्यसैले हामीले आफ्नो प्रक्रिया अगाडि बढाएका छौं । '

अघिल्लो स्थानीय तहको निर्वाचनमा दोस्रो भएको कांग्रेसले प्रमुख पदमा दावी गर्दै आएको थियो । नेकपा एमालेले प्रमुख र उपप्रमुख दुवै पदमा जित हात पारेको जीतपुरसिमरामा कांग्रेस दोस्रो र माओवादी तेस्रो भएको थियो । गठबन्धनबीच भागबण्डाको विषयमा छलफल सुरुवात भएलगत्तै कांग्रेस नगर कार्यसमितिले प्रमुख पदमा आफ्नो दावी रहेको र उक्त पद नपाए एक्लै चुनाव लड्ने निर्णय गर्दै केन्द्रमा पत्राचार गरेको थियो ।