मुस्ताङमा स्थानीय तह निर्वाचनमा ४ सय ९० सुरक्षाकर्मी परिचालन हुने
वैशाख १८, २०७९ आइतबार १६:३१:०
जोमसोम : यही वैशाख ३० गते हुने स्थानीय तह निर्वाचन २०७९ अन्तर्गत मुस्ताङका ५ स्थानीय तहमा झन्डै ४ सय ९० जना सुरक्षाकर्मी परिचालन गरिने भएको छ । यसका अतिरिक्त निर्वाचनको समयमा कुनै त्यस्तो अप्रिय घटना हुन नदिन नेपाली सेना ,सशस्त्र प्रहरी र नेपाल प्रहरीको क्वीक रियाक्सन टिम र सुरक्षा रिजर्भ फोर्स समेत तयारी अवस्थामा राखिएको छ ।
वैशाख ३० गते हुने स्थानीय तह निर्वाचनलाई स्वतन्त्र ,निष्पक्ष ,भयरहित वातावरणमा सम्पन्न गर्न जिल्लामा एकीकृत सुरक्षा रणनीति तयार भएको प्रमुख जिल्ला अधिकारी नेत्रप्रसाद शर्माले जानकारी दिए । निर्वाचनको समय अवधिभर नेपाली सेना,सशस्त्र प्रहरी ,जनपथ प्रहरी र म्यादी प्रहरीलगायतको टिमले सुरक्षा निगरानी गर्ने प्रजिअ शर्माले बताए।
वैशाख ३० गते हुने स्थानीय तह निर्वाचनका लागि मुस्ताङमा २५६ जना म्यादी प्रहरी खटाइने भएको छ भने सोही अनुपात जनपथ प्रहरी परिचालन हुने प्रहरी निरीक्षक राजकुमार तामाङले जानकारी दिए । मुस्ताङको ५ स्थानीय तहको ३८ मतदान केन्द्रमा २५६ जना म्यादी प्रहरी र ११२ जना जनपथ प्रहरी परिचालन हुनेछन् ।
प्रत्येक मतदान केन्द्र केन्द्रमा ५ जना म्यादी र ३ जना जनपथ प्रहरी खटाइने भएको छ। यस्तै, वैशाख ३० गते हुने स्थानीय तह निर्वाचनको सुरक्षाका लागि सशस्त्र प्रहरी ३३ नं. गुल्मले पनि सोही अनुसार आवश्यक तयार गरेको जनाएको छ ।
सशस्त्र प्रहरी गुल्मबाट ५ वटै स्थानीय तहमा ३–३ वटा मोबाइल सुरक्षा टिम खटाउनेछ । प्रत्येक मोबाइल टिममा ६ जना सशस्त्रका सुरक्षाकर्मी परिचालन गरिने छ ।यसका अतिरिक्त सशस्त्र प्रहरी गुल्मले ५ वटै स्थानीय तहमा निर्वाचन अधिकृतको कार्यालयको सुरक्षार्थ थप ५–५ जना सशस्त्र प्रहरी खटाइसकेको छ भने जिल्ला निर्वाचन कार्यालयको सुरक्षाका लागि ५ जना सशस्त्र प्रहरी खटाइसकेको छ ।
सशस्त्र प्रहरीले ३० जनाको संख्यामा क्वीक रियाक्सन टिम ( क्यूआरटीम) यूनिफर्मसहित तयारी अवस्थामा राखेको छ ।यो टिम कुनै मतदान केन्द्रको शान्ति सुरक्षामा खलबल हुन पुग्यो भने तत्काल त्यहाँ पुगेर शान्ति सुरक्षा कायम गर्न सहयोग गर्ने जनाइएको छ ।
निर्वाचन सुरक्षाका लागि म्यादी प्रहरी २५६ जना,जनपथ प्रहरी ११२ जना र सशस्त्र प्रहरी १२० जना ५ वटै तहमा परिचालन भइसकेका छन् । यसका अतिरिक्त ३ वटै सुरक्षा निकायको रिजर्भ फोर्स र प्रहरीको समेत मोबाइल टिम समेत खटाइने जिल्ला प्रशासन कार्यालय मुस्ताङले बताएको छ ।
निर्वाचनको दिन नेपाल प्रहरी र म्यादीले पहिलो घेरा ,सशस्त्र प्रहरीले दोस्रो घेरा र नेपाली सेनाले तेस्रो घेरामा रही सुरक्षा निगरानी गर्नेछ।
म्यादी प्रहरीलाई ५ वटै पालिकाको सुरक्षा पोष्टमा खटाइयो
स्थानीय तह निर्वाचनका लागि १२ दिन बाँकी रहँदा जिल्लामा राजनीतिक पार्टीको प्रचार प्रसार र घरदैलो अभियान सुरु भइसकेको छ । निर्वाचन प्रचार प्रसार र घरदैलो अभियानका क्रममा सम्भावित मुठभेडलाई रोक्न ५ वटै तहमा सुरक्षाकर्मी परिचालन गरिएको छ । यसका लागि मुस्ताङमा भर्ना भएका म्यादी प्रहरीलाई ५ वटै तहको सुरक्षा पोष्टमा खटाइँदै छ ।
उनीहरुले प्रहरीसहितको टोलीसँग सुरक्षा गस्ती गर्नेछन् । मुस्ताङ सदरमुकाम जोमसोम र आसपासका क्षेत्रमा नेपाली सेना ,सशस्त्र प्रहरी,जनपथ प्रहरी र म्यादी प्रहरीले सुरक्षा गस्तीलाई तीव्रता दिएका छन् ।
प्रतिक्रिया दिनुहोस !
