राहुल गान्धी ठमेलको डिस्को गएपछि भारतमा तरंग
काठमाडौं : भारतीय कांग्रेस आईका नेता राहुल गान्धी ठमेलको एक डिस्कोमा गएपछि भारतमा तरंग आएको छ।
साथीको विहेमा सहभागी हुन सोमबार साँझ काठमाडौं ओर्लिएका राहुल राति ठमेलस्थित एलओडी नाइटक्लब पुगेका थिए। उनी नाइट क्लब गएको भिडियो बाहिरिएसँगै भारतीय राजनीति तरंगित बनेको हो। भारतीय सञ्चारमाध्यमले पनि राहुलको डिस्को मनोरञ्जनलाई प्राथमिकता दिएका छन्।
सार्वजनिक भिडियोमा राहुल एक महिलासँग क्लबमा छन्। राहुलको नाइट क्लबको भिडियो सार्वजनिक भएसँगै भारतीय सत्तारुढ दल भाजपाका नेताहरुले उनको आलोचना गरेका छन् भने कांग्रेस आई प्रवक्ताले बचाउ गरेका छन्।
भाजपा प्रवक्ता शहजाद पुनावालाले देशभित्र भइरहेका हिंसामा चिन्ता व्यक्त गर्नु, जनताको समस्यामा साथ रहनुको सट्टा नेपालमा नाइट क्लबमा पार्टी गरेर बस्नु गैरजिम्मेवार भएको बताएका छन्। यो उनको निजी मामिला भएपछि देशमा उत्पन्न प्रतिकूल अवस्थामा जनताको साथमा उभिनुपर्नेमा डिस्को जानु उपयुक्त नभएको उनको भनाइ छ। ‘कांग्रेस पार्टी सिद्धिसक्यो। तर राहुल गान्धीको पार्टी चलिरहेको छ,’ उनले व्यंग्य गरे, ‘उनी राजनीतिमा गम्भीर छैनन। उनको पार्टी र देशलाई जरुरत परेका बेला उनी नेपालमा पार्टी गरेर बसेका छन्।’
केन्द्रीय कानुन न्यायमन्त्री किरेन रिजिजुले राहुल गान्धी भिडियो शेयर गर्दै अरुलाई उपदेश दिन सजिलो भएको तर आफूले कार्यान्वयन गर्न नपर्ने भनि प्रश्न गरेका छन्। एक सांसद र राष्ट्रिय राजनीतिक दलका नेताको रुपमा यो कार्य उपयुक्त नभएको उनले जिकिर गरेका छन्।
Regular Parties, Vacations, Holidays, Pleasure Trips, Private Foreign Visits etc are nothing new to the nation now.
— Kiren Rijiju (@KirenRijiju) May 3, 2022
As a private citizen there's no issue at all but when an MP, a permanent boss of a national political party who keeps preaching others..... https://t.co/r7bgkmHmvT
भाजपाका अर्का नेता कपिल मिश्राले पनि ट्वीटरमार्फत राहुल गान्धी कोसँग डिस्को गएको भनि प्रश्न गरेका छन्। ‘के चिनियाँ एजेन्टसँग हुन्?’ उनले प्रश्न गरेका छन्, ‘के राहुलले सेनाविरुद्ध चिनियाँ दबाबमा ट्वीट गर्छन्?’ उनले प्रश्न राहुलको होइन देशको भएको बताएका छन्।
भाजपा सामाजिक सञ्जाल इन्चार्ज अमित मालवीयले पनि राहुललाई व्यंग्य गरेका छन्। ‘जब मुम्बईमाथि हमला भएको थियो, तब पनि राहुल नाइट क्लबमा थिए। अहिले जब उनको पार्टी संकटमा छ, तब पनि नाइट क्लबमै छन्। उनमा निरन्तरता छ,’ उनले भनेका छन्।
राहुल गान्धीको डिस्को प्रवेशमा भाजपा नेताहरुले प्रश्न उठाएपछि कांग्रेस आईका प्रवक्ता रणदीप सुरजेवालाले भिडियोमा कुनै कुरा गलत नभएको प्रष्टीकरण दिएका छन्।
राहुल काठमाडौंमा आफ्नो साथीको विहेमा गएको र यो उनको व्यक्तिगत यात्रा भएको उनले प्रष्ट्याएका छन्।
विहे र इन्गेजमेन्टमा सहभागी हुनु भारतीय परम्परा भन्दै प्रवक्ता सुरजेवालाले प्रधानमन्त्री नरेन्द्र मोदी नबोलाएरै पाकिस्तानमा सहभागी भएजसरी राहुल गान्धी नगएको प्रष्ट पारे। कुनै साथीको विहे समारोहमा सहभागी हुनु अपराध नभएको उनको भनाइ छ।
राहुल आफ्नी नेपाली साथी सुम्निमा उदासको विहेमा सहभागी हुन काठमाडौं आएका हुन्। उनी होटल मेरियटमा बसेका छन्।
म्यानमारका लागि पूर्वनेपाली राजदूत भीम उदासकी छोरी एवं सीएनएनकी पूर्वपत्रकार सुम्निमाको नीमा मार्टिन शेर्पासँग आज विहे हुँदैछ। उनको विहेमा अन्य भारतीय हस्तीसमेत सहभागी छन्।