ताप्लेजुङ : ताप्लेजुङको फक्ताङ्लुङ गाउँपालिकाबाहेक सबै स्थानीय तहमा मतगणना सुरु भएको छ । जिल्ला निर्वाचन अधिकारी दिनेश खनालका अनुसार फुङ्लिङ नगरपालिकासहित ८ वटा पालिकाको मतगणना सुरु भएको हो । ९ स्थानीय तह रहेको जिल्लामा ८९ हजार ६ सय ८० मतदाता रहेका थिए । जसमा ६४ प्रतिशत अर्थात ५७ हजार ८ सय ९१ मत खसेको थियो । फक्ताङ्लुङमा भने भोली आईतबार दिउँसोसम्ममा मात्रै मतपेटिका संकलन हुने सम्भावना रहेको छ ।
उत्तरी सीमा चीनसँग सिमाना जोडिएको फक्ताङ्लुङ गाउँपालिका वडा नं ७ ओलाङ्चुङगोलाबाट मतपेटिका निर्वाचन अधिकृतको कार्यालय तापेथोक ल्याउने काम भईरहेको खनालले जानकारी दिए । याङ्मामा १८ मत खसेको थियो । यता मेरिङ्देन गाउँपालिका वडा नं ६ नाल्बूमा भने नेकपा एमालेका मनोजकुमार तुम्बाहाम्फेसहित सबै सेटले जितेको छ ।
तुम्बाहाम्फे ४ सय ५६ मत सहित विजयी भएका छन् । उनका निकटतम् प्रतिद्वन्दी रुख चिन्ह लिएर चुनावी मैदानमा रहेका ठाकुरसिंह लिम्बूले ३ सय २४ मत प्राप्त गरेका छन् । एमालेका वडाध्यक्षका उम्मेदवार १ सय ३२ मतान्तरले विजयी भएका छन् । नेपाल कम्युनिष्ट पार्टी एकीकृत समाजवादीका लिम्बू गठबन्धन गर्दै रुख चिन्ह लिएर चुनावी मैदानमा थिए ।
त्यहाँ २ खुुल्ला सदस्य, महिला सदस्य र दलित महिला सदस्यमा समेत एमालेका उम्मेदवार विजयी भएका छन् । मतगणना भइरहेको स्थानीय तहमा गठबन्धनका उम्मेदवारले अग्रता लिइरहेका छन् ।
प्रतिक्रिया दिनुहोस !
