राजविराज : स्थानीय तहको निर्वाचनमा नेकपा (माओवादी केन्द्र) ले पहिलो पालिकामा नगर प्रमुख जित हात पारेको छ।
कुल ११ वडा रहेको खडक नगरपालिकाको नगर प्रमुखमा विजयी भएको माओवादीले वडामा भने वडा नम्बर ६ को अध्यक्ष मात्र जित्न सकेको छ । नेकपा (एकिकृत समाजवादी) सँग गठबन्धन गरेर प्रमुखका उम्मेदवार बनेका जयप्रकाश चौधरी ५ हजार ८८२ मत ल्याई नगर प्रमुखमा निर्वाचित भएका हुन्।
निर्वाचन अधिकृतको कार्यालय खडकले दिएको जानकारी अनुसार निकट्तम प्रतिद्वन्द्वी हेमायु हकले ५ हजार ६७ मत ल्याए । हक नगरपालिकाका निवर्तमान प्रमुख हुन् ।
गठबन्धन गरेको नेकपा (एस)का तर्फबाट उपप्रमुखको उम्मेदवार बनेका शत्रुघ्नप्रसाद साह भने २ हजार ९४३ मत ल्याएर तेस्रो स्थानमा रहे ।
उपप्रमुखमा भने जसपाकी रिताकुमारी चौधरीले ६ हजार २३१ मत ल्याएर निर्वाचित भएकी छिन् । उनका निकट्तम प्रतिद्वन्द्वी कांंग्रेसकी यसमिन सुल्तान खातुनले ३ हजार २१० मत ल्याइन् । पराजित खातुन पनि निवर्तमान उपाध्यक्ष हुन् । गत स्थानीय तहको निर्वाचनमा संघीय समाजवादी फोरमका हक नगर प्रमुखमा निर्वाचित हुँदा कांग्रेसकी खातुन उपप्रमुखमा निर्वाचित भएकी थिइन् ।
वडा अध्यक्षमा जसपाले वडा नम्बर २, ६, ९ र ११, कांग्रेसले ३, ८ र १०, नेकपा (एस)ले ४ र ५ तथा लोसपा र माओवादीले क्रमशः १ र ६ वडा अध्यक्षमा निर्वाचित भएका छन् ।
वडा नम्बर १ मा ८११ मत ल्याएर राजकुमार साह, २ मा ३६८ मत ल्याएर हरेराम मण्डल, ३ मा ६७२ मत ल्याएर देवनारायण चौधरी, ४ मा ७७२ मत ल्याएर गंगाराम चौधरी, ५ मा ५८९ मत ल्याएर विजयकुमार साह वडा अध्यक्षमा निर्वाचित भएका छन् ।
यसैगरी वडा नम्बर ६ मा ३१६ मत ल्याएर कमालुदिन मियाँ, ७ मा ३७१ मत ल्याएर राकेशकुमार साह, ८ मा ५५८ मत ल्याएर बिन्दुलाल चौधरी, ९ मा ११९२ मत ल्याएर इसारुल मियाँ, १० मा ८७५ मत ल्याएर राजेन्द्रप्रसाद चौधरी र ११ मा १२४२ मत ल्याएर रामकृष्ण चौधरी वडा अध्यक्ष भएका छन् ।
सप्तरीमा हालसम्म घोषित १२ स्थानीय तहको परिणाम अनुसार कांग्रेसले ४, एमाले र जनमतले २÷२, जसपा, लोसपा, नेकपा (एस) र माओवादीले १÷१ स्थानीय तहमा जित हासिल गरेको छ ।
प्रतिक्रिया दिनुहोस !
