रामग्रामको कार्यपालिका सदस्य निर्वाचनमा एमालेले जसपा र राप्रपासँग गर्यो गठबन्धन
परासी : पश्चिम नवलपरासीको रामग्राम नगरपालिकामा कार्यपालिका सदस्य निर्वाचनका लागि एमालेसहितका तीन दलले गठबन्धन गरेर सदस्यको भागबण्डा गरेका छन्। त्यहाँ एमालेले मेयर र राप्रपाले उपमेयर जितेको छ।
बहुमत नपुग्ने भएपछि अफ्ठेरोमा परेको एमालेले आफ्नै अगुवाईमा वार्ता टोली गठन गरेर अन्य दलसँग सदस्यको भागबण्डा टुंग्याएको हो। बैठकमा एमालेसहित जनता समाजवादी पार्टी (जसपा) र राप्रपाका जिल्लादेखि केन्द्रीय नेताहरुको सहभागिता थियो।
नगरपालिकाको कार्यपालिकामा ८ जना सदस्य रहने व्यवस्था छ। ५ जना महिला सदस्य र ३ जना दलित/अल्पसंख्यकबाट सदस्य रहने छन्। त्यसका लागि जसपाले ५, एमालेले २ र राप्रपाले १ सदस्य पाउने गरी सहमति भएको एमाले वार्ता टोली सदस्य एंव पार्टी जिल्ला सचिव धीरज शर्मा बस्यालले बताए। गाउँपालिकामा भने ४ जना महिला सदस्य र २ जना दलित/अल्पसंख्यकबाट गरी कुल ६ सदस्य निर्वाचित हुने व्यवस्था छ।
१८ वडा रहेको नगरपालिकामा प्रमुख/उपप्रमुखसहित ९२ जना जनप्रतिनिधि चुनिएका छन्। बहुमतका लागि ४६ जनप्रतिनिधि आवश्यक छ। ३ दलबाट निर्वाचित हुने जनप्रतिनिधिको संख्या ६३ छ। जसमा एमाले र जसपाका २५/२५ जना र राप्रपाका १३ प्रतिनिधिहरु चुनिएका छन्। नेपाली कांग्रेसका २८ जना र स्वतन्त्रका १ जना जनप्रतिनिधि चुनिएका छन्। कार्यपालिका सदस्य चयनका लागि हुने निर्वाचनमा निर्वाचित जनप्रतिनिधिहरु मतदाता हुन्। कार्यपालिका गठनका लागि ११ गते मनोनयन र १९ गते निर्वाचन तोकिएको छ।