राजविराज : सप्तरीको रूपनी गाउँपालिकाको परिणाम सार्वजनिक भएसंगै १८ वटा स्थानीय तह रहेको सप्तरीको सम्पूर्ण मतगणना कार्य सकिएको छ। रूपनी गाउँपालिकामा निवर्तमान प्रमुख र उपप्रमुखलाई पराजित गर्दै लोसपाका उम्मेदवारहरू विजयी भएका छन्।
लोसपाका दिनेशकुमार यादव ४ हजार २६९ मतका साथ अध्यक्षमा निर्वाचित भएको निर्वाचन अधिकृतको कार्यालय रूपनीले जनाएको छ। निकट्तम प्रतिद्वन्द्वी जसपाका हरेराम यादवले ३ हजार ९३५ मत ल्याए। गाउँपालिका उपप्रमुखमा लोसपाकै पुष्पाकुमारी श्रेष्ठ ५६ मतको अन्तरले विजयी भइन्। श्रेष्ठले ३ हजार ७१० मत ल्याइन भने निकटतम प्रतिद्वन्द्वी जसपाकी बेचनीदेबी सरदार ३ हजार ६५४ मतमा समेटिइन्। यसअघि २०७४ को निर्वाचनमा राजपाबाट लडेकी श्रेष्ठ ९ मतको अन्तरले वडा नम्बर ६ मा महिला सदस्य भएकी थिइन्।
स्थानीय तह २०७४ को निर्वाचनमा राजपाबाटै लडेका हरेराम यादव र बेचनीदेबी सरदार अध्यक्ष र उपाध्यक्षमा निर्वाचित भएका थिए। दुबै जना जसपा र लोसपा विभाजन हुँदा जसपामै रहे। पाँच वर्षको अवधिमा मतदाता बढेर १८ हजार १६५ भएपनि यसअघि हरेरामले ल्याएको ४ हजार ६८ र सरदारले ल्याएको ३ हजार ९३६ मत पनि यसपटक ल्याउन सकेनन्।
कुल ६ वडा रहेको गाउँपालिकामा माओवादी केन्द्र र जसपाले २\२ तथा कांग्रेस र लोसपाले १\१ वडाध्यक्षमा विजयी हासिल गरेको छ।
लोसपाबाट वडा नम्बर १ मा ११४९ मत ल्याएर लीला यादव, वडा नम्बर २ बाट ५२६ मत ल्याएर माओवादीका सरोजकुमार यादव, वडा नम्बर ३ बाट ७३९ मत ल्याएर नेपाली कांग्रेसका अमर मुखिया, वडा नम्बर ४ बाट ६१८ मत ल्याएर नेकपा (माओवादी केन्द्र) का छेदी इशर, वडा नम्बर ५ र ६ बाट जसपाका क्रमशः गंगाराम यादवले १०११ र बद्रीनारायण सरदारले ८३८ मत ल्याएर वडा अध्यक्षमा निर्वाचित भएका छन्। मुखिया र इशर यसअघि पनि वडाध्यक्ष थिए।
रूपनीको परिणामसँगै सप्तरीको सबै स्थानीय तहको मतगणना सम्पन्न भएको छ। कांग्रेस जिल्लाको सर्वाधिक ५ स्थानीय तहमा निर्वाचित भएको छ। जसपा, एमाले र लोसपाले ३\३ स्थानीय तहमा जित हासिल गरेको छ। जनमत पार्टीले २ स्थानीय तह तथा नेकपा माओवादी केन्द्र र नेकपा (एस)ले १\१ स्थानीय तहमा विजयी हासिल गरेको छ।
यसअघि २०७४ को निर्वाचनमा कांग्रेस, जसपा र लोसपाले ५\५, एमालेले २ र नयाँ शक्ति पार्टीले १ स्थानीय तहमा विजय हासिल गरेको थियो।
प्रतिक्रिया दिनुहोस !
