युक्रेनलाई उच्च प्रविधियुक्त हतियार पठाउन अमेरिकासहित २० देश सहमत
किभ : अमेरिकी रक्षामन्त्री लोयड अस्टिनले युक्रेनको सेनालाई सहयोग गर्न करिब २० देश थप हतियार उपलब्ध गराउन अगाडि आएको बताएका छन्। समाचार एजेन्सी पीटीआईका अनुसार सोमबार विश्वका करिब ५० देशका नेताहरूले भर्चुअल बैठक गरेर युक्रेनलाई हार्पुन लन्चर-मिसाइल सहित धेरै उन्नत हतियार दिन सहमत भएका हुन्।
बैठकपछि अस्टिनले मिडियाको अगाडि डेनमार्कप्रति कृतज्ञता व्यक्त गरे। डेनमार्कले युक्रेनलाई हार्पुन एन्टी-शिप मिसाइलहरू दिने वाचा गरेको छ। यसले युक्रेनको आक्रमण क्षमतालाई धेरै गुणा बढाउने विश्वास गरिएको छ।
अमेरिकाका सबैभन्दा वरिष्ठ सैन्य अधिकारी जनरल मार्क मिलेले पनि युक्रेनमा अमेरिकी हतियार प्रशिक्षकहरू पठाउने विषयमा अधिकारीहरूबीच छलफल जारी रहेको बताए। यद्यपि उनले अमेरिकाले आफ्ना सैनिकलाई युद्धमा नपठाउने पनि जोड दिए।
युक्रेनमा रुसी आक्रमण हुनुअघि नै अमेरिकाले त्यहाँ रहेका आफ्ना केही सैनिक फिर्ता लगेको थियो। तर, मिलिले युक्रेनमा रहेको अमेरिकी दूतावासको सुरक्षाका लागि केही सेना किभ पठाउन सकिने पनि स्पष्ट पारे।
अमेरिकाले किभमा आफ्नो दूतावास आंशिक रूपमा खोलेको छ। त्यसयता अमेरिकाले आफ्नो सुरक्षाका लागि युक्रेनमा समुद्री सुरक्षा बल फिर्ता पठाउने हो कि होइन भन्ने प्रश्न उठिरहेको छ। जनरल मिलिले युक्रेनमा विशेष अपरेशन फोर्स पठाउने सम्भावनालाई पनि अस्वीकार गरे। बीबीसी