चुनावमा अप्रत्यासित नतिजा आएपछि माओवादीका दुई नेताले दिए राजीनामा

उदयपुर : गठबन्धन हुँदापनि अप्रत्यासित नतिजा आएपछि उदयपुरको बेलका नगरपालिकामा नेकपा माओवादी केन्द्रका दुई पदाधिकारीले पदबाट राजीनामा दिएका छन्।

 
भागबण्डामा परेको उपमेयरलगायत वडा र सदस्यमा पार्टीलाई पहिलो बनाउन नसकेको भन्दै नगर कमिटी सचिव भरत घिमिरे र प्रवक्ता ललित राईले मंगलबार राजीनामा दिएका हुन्।
 
दुबैले संयुक्त एक विज्ञप्ति जारी गर्दै नैतिकताको आधारमा आफूहरूले पद छोडेको बताएका छन्। घिमिरेको गृहवडा ९ र राईको गृहवडा ४ मा माओवादी केन्द्रका कुनै पनि उम्मेदवारले जित्न सकेनन्। वडा नम्बर ४ नै घर भएका माओवादी नगर कमिटी अध्यक्ष मनोज तामाङले उपमेयरमा हारेका छन्।

विज्ञप्तिमा पदबाट राजीनामा दिएपनि नगर पार्टीको काम र संगठनमा भने कृयाशिल रहने बताएका छन्। सचिव र प्रवक्ताको राजीनामाले नगर कमिटी अध्यक्ष तथा उपमेयरका उमेदवार तामाङमाथि समेत दवाब बढेको छ। 

बेलकामा माओवादीले गठबन्धन भएर पनि वडानं ७ र ८ मात्र जित निकालेको छ। कांग्रेससंग गठबन्धन गरेको माओवादीले मेयरमा कांग्रेसका अशोक कार्की र उपपमेयरमा आफ्ना उमेदवार मनोज तामाङ्गलाई चुनावी मैदानमा उतारेको थियो।
 
उपमेयरमा माओवादीका उम्मेदवार तामाङलाई ७८१ मतको अन्तरले एमालेकी जिरा राईले पराजित गरेकी थिईन्। त्यसैगरी मेयरमा कांग्रेसका कार्कीले एमालेका दुर्गा थापालाई ३ हजार १४० मतको अन्तरले पराजित गरेका थिए।