विश्व वातावरण दिवसमा शालिग्राम उद्यान पार्कमा वृक्षारोपण तथा सरसफाइ

जोमसोम : ४९ औं विश्व वातावरण दिवसको अवसरमा मुस्ताङको घरपझोङ–४ जोमसोमस्थित शालिग्राम उद्यान पार्कमा आइतबार वृक्षारोपण तथा सरसफाइ गरिएको छ ।

डिभिजन बन कार्यालय मुस्ताङको आयोजना तथा अन्नपूर्ण संरक्षणक्षेत्र आयोजना, ईलाका सरक्षण कार्यालय जोमसोमको सह-आयोजनामा भएको वृक्षारोपण तथा सरसफाइ कार्यक्रमको समन्वय जिल्ला प्रशासन मुस्ताङले गरेको थियो ।

विश्व वातावरण दिवस मार्च ५ तारिख २०२२ को अवसरमा ‘पृथ्वीको सरक्षण : दिगो प्रकृतिमैत्री जीवनयात्रा’नारासहित जिल्ला प्रशासन कार्यालय पछाडिपट्टी रहेको शालिग्राम उद्यान पार्कमा वातावरण संरक्षणका लागि वृक्षारोपण गरिएको हो ।

वृक्षारोपण कार्यक्रममा जिल्लास्थित सरकारी कार्यालय प्रमुख र जिल्लाका ३ वटै सुरक्षा निकायको सहभागीता रहेको थियो।

विश्व वातावरण दिवसमा भोटे पिपल,बैस,ओखर,धुपी,सल्ला र रुवेनिया लगायतका ६० वटा प्रजातीका विरुवा रोपण गरिएको डिभिजन बन कार्यालयका प्रमुख वषन्तकेशव अधिकारीले जानकारी दिए ।उनले दिवसको अवसरमा यसअघि लगाएका पुराना बिरुवाहरुको गोडमेल र सिचाइंको व्यवस्थापन समेत गरिएको उनले बताए ।

यस्तै,वातावरण दिवसको अवसरमा शनिबार र आइतबार स्थानीय प्रशासनको समन्वयमा जिल्लास्थित सरकारी कार्यालय र सुरक्षा निकायको टोलीले जोमसोम बजार र कालिगण्डकी नदीको तटीयक्षेत्रमा सरसफाइ गरिएको मुस्ताङका प्रमुख जिल्ला अधिकारी नेत्रप्रसाद शर्माले जानकारी दिए ।