विराटनगर : विगत दुई दिनदेखि अविरल वर्षासँगै आएको बाढीबाट विस्थापितलाई युवाहरुले खाना दिन थालेका छन् ।
विराटनगरका युवा समाजसेवी वासिम आलमको नेतृत्वमा रहेको मनकारी युवाहरुको समूह हाम्रो अभियानले मगंलबारदेखि नै निःशुल्क खाना खुवाउने अभियान सुरु गरेका हुन् ।
विराटनगर महानगरपालिकाको पूर्वी सीमा भएर बग्ने सिंघिया खोलाको बाढी बस्ती पसेपछि विस्थापित भएका १सय ६५ जनालाई अभियानले हिजो बेलुकादेखि खाना खुवाउन सुरु गरेका हुन् । अभियानको नेतृत्व गरिरहेका युवा अभियन्ता समेत रहेका बासिम आलमले बुधबार २सय ५० जनालाई खाना खुवाउने तयारी रहेको बताए ।
उनले बाढीबाट विस्थापित भएकाहरु भोखै बस्नु नपरोस् भनेर खाना खुवाउने अभियान सुरु गरेको जानकारी दिए । विस्थापितले खाना नपाएको थाहा पाउना साथ आफ्नो टिम खाना लिएर पुग्ने गरेको उनले बताए ।
कसैलाई समस्या छ भने आफूहरुलाई जानकारी दिन उनले अनुरोध गरेका छन्। यसअघि सोही टिमले पहिलो लकडाउनमा (८०) दिन निरन्तर खाना वितरण गरेको थियो । दोस्रो पटक लकडाउन हुँदा मजदुरी गर्नेहरू र सडकपेटीमा बस्नेहरुलाई आलमको नेतृवमा रहेका मनकारी युवाहरुको समूहले दुई छाक खाना खुवाएका थिए ।
वसिम आलमको नेतृत्वमा दुई दर्जन युवा र युवती अभियानमा सहभागी छन्।
उनीहरू आफै रकम संकलन गरेर खाना जुटाउने गरेका छन् ।
आलमले यो अभियान राजनीतिभन्दा टाढा रहेको बताए। निःशुल्क खाना पकाउने खुवाउने अभियानमा कुनै ब्यानर झन्डा बोक्न नपाइने नियम पनि छ। _20220629115839.jpg)
प्रतिक्रिया दिनुहोस !
