जोमसोम: मुस्ताङ सदरमुकाम जोमसोमको सरकारी कार्यालय जाने सडकको अहिले मर्मतकार्य सुरु गरिएको छ । जोमसोमको काठेपुलदेखि जिल्ला निर्वाचन कार्यालयसम्म सडक निर्माण गरिएको एक वर्ष नपुग्दै बिग्रिएको हो।
आर्थिक वर्ष २०७७/०७८ मा गण्डकी प्रदेश सरकारअन्तर्गत भौतिक पूर्वाधार शहरी विकास तथा यातायात मन्त्रालयबाट विनियोजित बजेटमार्फत जोमसोमको सरकारी कार्यालय जाने सडक विस्तार कार्य अघि बढाइएको थियो । सानदार निर्माण सेवाले सडक स्तरोन्नतिका लागि ४५ लाख लागतमा ठेक्का सम्झौता गरेको थियो ।
२०७७/०७८ को बैशाखमा ठेक्का आह्वान भइ जेठमा सरकारी कार्यालय जाने सडक स्तरोन्नतिकार्य अघि बढेको थियो । २५० मिटर लम्बाई रहने गरी सुरु गरिएको सडकमा १५ सेमीको आरसीसी ढलान गरिएको थियो । सडकको चौडाई भने बस्तीअनुसार निर्धारण गरिएको थियो ।
२५० मिटर सडकको दुई स्थानमा खेतबारीको पानी सडकबाट तल जाने निकास (क्रसिङ) निर्माण गरिएको थियो ।सम्झौता अवधि ६ महिना रहेको जोमसोमस्थित सरकारी कार्यालय जाने सडक चालु आर्थिक वर्षको असोजमा पूर्वाधार विकास कार्यालय मुस्ताङलाई हस्तान्तरण गरिएको थियो ।
तर, हस्तान्तर गरिएको एक वर्ष नपुग्दै सरकारी कार्यालय जाने सडक बिग्रिन पुगेको हो ।
निर्माण सेवाले हतारमा काम सकेर हस्तान्तरण भुक्तानी लिने बेलामा सडकमा समस्या देखिएको हो । सडक अनुगमनमा सडक बिग्रिएको पाइएपछि पूर्वाधार विकास कार्यालयले पुन: सडक मर्मत गर्न लगाएको हो ।
कार्यालयले भुक्तानी रोकेर सडक मर्मत गर्न लगाएपछि निर्माण कम्पनीले फिल्ड आएर सडक मर्मत सुरु गरेको पूर्वाधार विकास कार्यालयका प्रमुख विवेक सिग्देलले जानकारी दिए । उनका अनुसार काठेपुलदेखि निर्वाचन कार्यालयसम्म साविकको सडकमाथि ५ सेमीको ढलान गर्ने कार्य अघि बढेको हो ।
सरकारी प्रावधान अनुसार कुनै पनि निर्माण कम्पनीले जिम्मा लिएको पूर्वाधार विकासको काम सम्पन्न भइ हस्तान्तरण भएपनि त्यसको परीक्षण अवधि १ वर्षको रहने कार्यालय प्रमुख सिग्देलले उल्लेख गरे ।
पूर्वाधार हस्तान्तरण गर्दा सम्बन्धित निर्माण कम्पनीको ५ प्रतिशत भुक्तानी सरकारी कार्यालयमा मौज्याद रहने र परीक्षण अवधिपछि मात्र बाँकी भुक्तानी हुने कार्यालय प्रमुख सिग्देलको भनाइ छ । उनले कुनै पनि पूर्वाधार हतारमा गर्दा त्यस्ता पूर्वाधार दिगो नहुने बताए ।
बर्सेनि नयाँ आर्थिक वर्षमा हिमाली जिल्लामा ठेक्का सम्झौता हुँदा जाडो महिना सुरु हुने र बैशाखदेखि काम सुरु गर्दा समय अपुग हुने जनाए ।
प्रतिक्रिया दिनुहोस !
