स्याङ्जा : असारको अन्तिम दिनसम्म स्याङजामा ८० प्रतिशत खेतमा रोपाइँ सकिएको छ।
रोपाइँ हुने कुल क्षेत्रफलमध्ये अब २० प्रतिशत भू-भागमा भने रोपाई हुन बाँकी छ।
कालीगण्डकी र गल्याङ्मा ६० प्रतिशत रोपाइँ भएको छ। आँधीखोला, फेदिखोला, अर्जुनचौपारी गाउँपालिका र पुतलीबजार, भीरकोट, वालिङ् नगरपालिकामा ९५ प्रतिशत सकिएका छन्।
जिल्लामा ८० प्रतिशत धान खेत रोपेर सकिएको कृषि ज्ञान केन्द्रका प्रमुख विनोद हमालले जानकारी दिए।
आँधीखोला, ज्याग्दीखोला, कालीगण्डकी नदीको पानीले सिंचित गर्दै धान रोपिन्छ। जिल्लामा १६ हजार हेक्टरमा धानखेती भएको कृषि अधिकृत इश्वरीप्रसाद अर्यालले बताए। उनका अनुसार साबित्री, रामधान, सुनौलो सुन्गन्धा र स्थानीय जातका धानको उत्पादन राम्रो हुन्छ।
छिटै पर्याप्त वर्षा भएका कारण यो वर्ष किसानले समयमै धान रोप्न पाएका हुन्। साउनको अन्तिमसम्म रोपिने टारी खेत पनि यसपटक रोपिसकिएका छन्।
सिचाइँ पुगेका खेतमा जेठको तेस्रोसातादेखि रोपाइँ सुरु गरिन्छन्। तर, असारको तेस्रो सातादेखि भने यहाँ खडेरी परेको छ।
आँधीखोला किनार, कालीगण्डकी नदी किनार, ज्याग्दीखोला किनार, चापाकोट टार, रत्नपुर, कुवाकोट , गल्याङका क्षेत्र, सेतीदोभान फाँटहरु र बिरुवा फाँटहरु धान उत्पादनका पकेट क्षेत्र हुन्।
दहथुम, स्वरेक, खिलुङ, पुतलीबजार, वालिङ, चापाकोट, रत्नपुर, मल्यांकोट, चिन्नेवास, सेतीदोभान, बिरुवा, बिर्घा, अर्जुनचौपारी, राङभाङ, तुलसीभन्ज्याङ, जगतभन्ज्याङ, गल्याङमा पनि धान उत्पादन अत्यन्तै राम्रो हुन्छ। 
यसपटक जिल्लामा रामधान, सावित्री, सुनौलो सुगन्धा, उन्नत जात र हाईव्रीड धान रोपिएका छन्। जिल्लाका ४० प्रतिशतमा फलफूल, २० प्रतिशत पाखो र टारीखेत भएको केन्द्रले जनाएको छ।
कार्यालयका अनुसार गतवर्ष स्याङ्जामा ५० हजार मेट्रिक टन धान उत्पादन भएको थियो।
प्रतिक्रिया दिनुहोस !
