मुस्ताङको वारागुङ मुक्तिक्षेत्रका तीन ठाउँमा बाढी-पहिरो, सडक अवरुद्ध

जोमसोम : गए रातीको अविरल वर्षाका कारण मुस्ताङको तीन ठाउँमा सडक अवरुद्ध भएको जिल्ला प्रहरी कार्यालय मुस्ताङले जनाएको छ। बाढी पहिरोले वारागुङ मुक्तिक्षेत्रको लुप्रा-पान्डा खोला ,वारागुङ मुक्तिक्षेत्र–४ को कागबेनी खोला र  वारागुङ मुक्तिक्षेत्र–३ छुसाङ-चैलेको कालाभीरमा सडक अवरुद्ध भएको जिल्ला प्रहरी कार्यालय मुस्ताङका सूचना अधिकारी गोपीकृष्ण सुवेदीले जानकारी दिए ।

मुस्ताङको लुप्रा–पान्डा खोलामा बर्सेनि खोला एकातिर पुल एकातिर हुँदा उपल्ल्लो मुस्ताङ जाने सवारी साधनले सास्ती भोग्दै आइरहेका छन् । यसपटक पनि दुई पटक बाढीका कारण पुल छेउको सडक अवरुद्ध भएको थियो । गए रातीको वर्षाले लुप्रा–पान्डा खोलाले धार परिवर्तन गर्दा पुल एकातिर र सडक एकातीर हुँदा उपल्लो मुस्ताङ र मुक्तिनाथ जाने सवारी बिच सडकमै अलपत्र परेका छन् ।

वारागुङ मुक्तिक्षेत्र–४ कागबेनीमा पनि मुक्तिक्षेत्रबाट बग्ने खोलाको बाढीले सडक अवरुद्ध भएको प्रहरीले बताएको छ । सूचना अधिकारी सुवेदीका अनुसार कागबेनी खोलामा निर्माधिन पक्की पुल तल बाढीले सडक खोतल्दै गहिरो बनाउँदा सडक अवरुद्ध भएको हो ।

यस्तै वारागुङको छुसाङ स्थित कालाभीरमा लेदो पदार्थसहित आएको बाढीले  सडक पुरिएको प्रहरीले उल्लेख गरेको छ । अहिले जिल्ला प्रशासन कार्यालय,प्रहरी र स्थानीय निकायको समन्वयमा अवरुद्ध सडक खुलाउन पहल भइरहेको सूचना अधिकारी प्रहरी निरीक्षक गोपीकृष्ण सुवेदीले जानकारी दिए ।