गोरखा : गोरखामा राष्ट्रिय विभूति अमरसिंह थापाको शालिक स्थापना गरिएको छ ।
उनको जन्मस्थान मानिएको सिरानचोक गाउँपालिका- ६ स्थित अमरसिंह स्मृति स्मारकमा निर्माण गरिएको शालिकको सोमबार एक कार्यक्रमका बीच अनावरण गरिएको हो ।
उनको २०६ औं जन्मजयन्तीको अवसर पारेर सालिक अनावरण गरिएको स्थानीय नारायण दानीले जानकारी दिए ।
सोही कार्यक्रममा राष्ट्रिय विभूति अमरसिंह थापा र उनका पिता उमराव बाघ भीमसिंह थापाको पनि शालिक अनावरण गरिएको हो।
गोरखा अमरसिंह नगर पर्यटन समितिले अमरसिंह थापाको २०६ औं जन्मजयन्ती समारोह आयोजना गरेको थियो ।
कार्यक्रममा बोल्ने अधिकांश वक्ताहरुले राष्ट्रिय विभूति अमरसिंह थापाले नेपालको एकीकरण अभियानलाई थप अघि बढाउन, विखण्डनबाट रोक्न र इस्ट इण्डिया कम्पनीको कब्जाबाट जोगाउन महत्वपुर्ण भूमिका खेलेको बताए ।
अमरसिंह थापालगायतका वीरवीरंगनाहरूको अथक प्रयास र योगदानले नेपालको सीमाना पूर्वमा टिष्टा र पश्चिममा काँकडासम्म पुर्याउन सम्भव भएकाले उनीहरुको सम्मान गर्नु सबैको दायित्व भएको वक्ताहरुले बताएका थिए । गाउँपालिकाकबाट विनियोजित बजेटबाट अमरसिंह पार्क निर्माण गरिएको हो ।
गोरखा अमरसिंह नगर पर्यटन समितिका अध्यक्ष हरिबहादुर थापाको अध्यक्षता तथा गाउँपालिका प्रमुख ज्ञानेन्द्र गुरुङको प्रमुख आतिथ्यतामा भएको कार्यक्रममा पालिका उपप्रमुख रिता देवकोटा, वडा नं. ६ का वडा अध्यक्ष प्रेम वस्ती, निवर्तमान वडा अध्यक्ष नारायणबाबु दानी, गोरखा अमरसिंह नगर पयटन कार्य समितिका वरिष्ठ उपाध्यक्ष खमबहादुर राना, सन्सरी माविका प्रअ रामकाजी श्रेष्ठ लगायतले शुभकामना मन्तव्य राखेका थिए ।
प्रतिक्रिया दिनुहोस !
