धरान : जनता समाजवादी पार्टीका संघीय परिषद् अध्यक्ष अशोक राई सुनसरी क्षेत्र नम्बर १ बाट चुनाव लड्ने भएका छन्।
उनले आगामी प्रदेश र संघको निर्वाचनमा सत्ता साझेदार गठबन्धन संयुक्त रूपमा चुनावी मैदानमा उत्रने बताए। उनले सत्ता गठबन्धनभित्र सिट बाँडफाँटमा केही समस्या भएकाले यसको समाधानका लागि पहल भइरहेको बताए। उनले आफू सुनसरी क्षेत्र नम्बर १ बाट चुनाव लड्ने तयारी गरिरहेको पनि बताए।
उनले २०७४ को संसदीय निर्वाचनमा धरानका जनताले आफूलाई दोस्रो स्थान दिएर माया गरेकाले पुनः यहीबाट चुनाव लड्ने मनसाय बनाएको बताए। उनले सिट बाँडफाँटमा सुनसरी क्षेत्र नम्बर १ नपाए पनि गठबन्धनले टिकट दिएको स्थानमा गएर पनि चुनाव लड्न तयार भएको बताए।
खोटाङ र उदयपुर छाडेर सुनसरी किन आउनुभयो? भन्ने सञ्चारकर्मीले सोधेको प्रश्नमा उनले लोकतन्त्रमा जुन क्षेत्रमा गएर पनि चुनाव लड्न पाउने बताए। उनले केही दलहरूले राजतन्त्र र संघीयता खारेजीको गलत कुरा उठाएको बताए। उनले जनताले आन्दोलन गरेर ल्याएको गणतन्त्र संस्थागत भइसकेकाले राजतन्त्रको दिउँसै सपना नदेख्न चेतावनी दिएका छन्।
प्रतिक्रिया दिनुहोस !
