लमजुङको सुपर दोर्दी 'ख' जलविद्युतको ८८ प्रतिशत निर्माण पूरा

बेंसीसहर : लमजुङको दोर्दी खोलामा निर्माणाधिन ५४ मेगावाटको सुपर दोर्दी ‘ख’जलविद्युत आयोजनाको निर्माणकार्य ८८ प्रतिशत पूरा भएको छ । 

पिपुल्स हाइड्रो पावर कम्पनीले निर्माण गरिरहेको आयोजनाको बाँध, विद्युतगृह, सुरङमार्ग सबै क्षेत्रको काम एक साथ अघि बढेको कम्पनीले जनाएको छ । आयोजनाको बाँध क्षेत्रको पुनः निर्माणको काम भइरहेको छ । गत असारमा आएको बाढी पहिरोले बाँध क्षेत्रको संरचना बगाएको थियो । बाढी पहिरोले बाँध क्षेत्रसम्म पुग्ने पुहँचमार्ग बगाएपछि रोकिएको काम तीब्र गतिमा अघि बढेको हो ।

आयोजनाको ५ हजार १०० मिटर सुरुङ खन्ने र १ हजार १०० मिटर पेनस्टक पाइप जडानको काम पूरा भएको छ । हाइ हिमालय हाइड्रो कन्स्ट्रक्सन कम्पनी प्रालिले निर्माण गरिरहेको विद्युतगृहको ८५ प्रतिशत काम पूरा भएको छ । इलेक्ट्रो मेकानिकल उपकरण जडानको काम ७० प्रतिशत पूरा भएको छ ।

आयोजनाको सबै काम पूरा गरेर २०७९ माघभित्र विद्युत उत्पादन सुरु गर्ने लक्ष्य छ । आयोजनाबाट यसअघि २०७८ फागुनभित्र उत्पादन गर्ने लक्ष्य थियो । गत असार १ गते राति दोर्दी खोलामा आएको भीषण बाढीले पहुँच सडक तथा आयोजनाको संरचनामा ठूलो क्षति पुर्याउँदा तालिका प्रभावित भएको हो ।

आयोजना सम्पन्न  भएपछि उत्पादन हुने विद्युत दोर्दी कोरिडोर प्रसारण लाइनको  किर्तीपूर सबस्टेसनमा जोडिनेछ । सबस्टेसनसम्मको  आवश्यक प्रसारण लाइन कम्पनी आफैले निर्माण गरिरहेको छ । ६ किलोमिटर लामो प्रसारण लाइनमा २० वटा टावर रहनेछ । लाइनको काम पनि ६५ प्रतिशत पूरा भएको कम्पनीले जनाएको छ ।

आयोजनाबाट २०७६ फागुनदेखि विद्युत उत्पादन गर्ने तालिका भए पनि भूकम्प, नाकाबन्दी, दोर्दी खोलामा आएको भीषण बाढीको क्षति तथा कोभिड–१९ महामारीको असरले निर्माण प्रभावित हुँदा धकेलिँदै गएको हो ।

कोभिड–१९ को नियन्त्रण गर्न गरिएको लकडाउन र निशेधाज्ञाका कारण निर्माण सामाग्री आयात गर्न नसक्दा तथा कामदार अभावले आयोजनाको निर्माण ६ महिनासम्म सुस्त बनेको थियो । अवस्था सहज हुँदै गएपछि मात्रै फेरि निर्माणलाई गति दिन सकेको कम्पनीले जनाएको छ ।

आयोजना सम्पन्न गर्न ८ अर्ब २९ करोड रुपैयाँ लागत अनुमान गरिए पनि निर्माण अवधि लम्बिँदा केही बढ्ने देखिएको कम्पनीले जनाएको छ । विद्युत उत्पादन अवधि लम्बिँदा तथा विदेशी विनिमयदरमा भएको वृद्धिले लागत बढ्ने देखिएको छ ।

आयोजनामा सानिमा बैंकको अगुवाइमा ९ वटा बैंकले ५ अर्ब ८० करोड रुपैयाँ ऋण लगानी गरेका छन् । २ अर्ब ४९ करोड रुपैयाँ स्वपुँजी (इक्विटी) लगानी छ । आयोजनामा लमजुङबासीको २७ करोड रुपैयाँ लगानी छ । सुरुमा यो आयोजना ४९.६ मेगावाट क्षमतामा निर्माण गर्ने तय भएको थियो । पछि आयोजनाको स्तरोन्नति गरेर क्षमता ५४ मेगावाट पुर्‍याइएको हो।