सिट भागबण्डामा उपेक्षा गरिए जसपा एक्लै चुनाव लड्छ : उपेन्द्र यादव

वीरगन्ज : जनता समाजवादी पार्टी (जसपा) का राष्ट्रिय अध्यक्ष उपेन्द्र यादवले गठबन्धनमा उपेक्षा गरिए जसपा एक्लै चुनाव लड्न तयार रहेको बताएका छन् । 

वीरगन्जमा बुधबार जसपाको अगुवा कार्यकर्ता भेलालाइ सम्बोधन गर्दै अध्यक्ष यादवले भने ,‘ गठबन्धनको बैठकमा सिट बाँडफाँटको छलफल हुँदा जसपालाई उपेक्षा गरिएको जस्तो महशुस हुन्छ , यदि साँच्चै उपेक्षा गरियो भने जसपा एक्लै चुनाव लड्न तयार छ । '

यादवले जसपाको हैसियतअनुसार सिट बाँडफाँट नगरिए एक्लै चुनाव लड्ने उद्घोष गर्दै त्यहिअनुसारको तयारीमा लाग्न नेता कार्यकर्तालाइ निर्देशन पनि दिए ।

आफूहरु गठबन्धनको विरोधी नभएको प्रस्ट्याउँदै उनले अहिलेको गठबन्धनलाइ निरन्तरता दिनुपर्ने आजको आवश्यकता भएको बताए । उनले भने,‘ प्रतिगमनकारी शक्तिहरु फेरि पनि सल्बलाउन खोजी रहेका छन् , त्यसैले उनीहरुले फेरि टाउको नउठाउन भनेर अहिलेको गठबन्धनलाई निरन्तरता दिनु आजको आवश्यकता हो । '
 
अध्यक्ष यादवले आगामी निर्वाचनमा संघीयता र गणतन्त्र विरोधी प्रतिगमनकारी शक्तिलाई जसरी भएपनि परास्त गर्नुपर्ने पनि बताए ।

आगामी निर्वाचनमा  संघीयता र गणतन्त्रका पक्षधरहरु पराजित भए प्रतिगमनकारी शक्तिले संघीयता र लोकतन्त्रलाई समाप्त पार्ने र मधेस फेरि गुलाम (नोकर) बन्ने खतरा रहेको यादवको भनाइ छ।

संघीयता र गणतन्त्रको जननी मधेसी दल रहेको दाबी गर्दै उनले मधेस विद्रोहकै कारण मुलुकमा संघीयता र गणतन्त्र आएको दावी गरे। यादवले भने,‘मधेस विद्रोहकै कारण संघीयता र गणतन्त्र आएको हो , यदि मधेस विद्रोह नभएको भए यो देशमा न संघीयता आउँथ्यो न गणतन्त्र नै ।'

त्यसैले संघीयता , गणतन्त्रलगायतका प्राप्त राजनीतिक उपलब्धीको रक्षा गर्ने मुख्य अभिभारा जसपाकै भएको उनले बताए ।

जसपा पर्साका अध्यक्ष रामनरेश प्रसाद यादवको अध्यक्षतामा भएको अगुवा कार्यकर्ता भेलालाई जसपाका राजनीतिक समिति सदस्यहरु हरिनारायण रौनीयार, देवेन्द्र मिश्रा , बालकिशोर यादव ,मोहन चौधरी , केन्द्रीय सदस्य करिमा बेगम , सलमा खातुन ,जिल्ला इन्चार्ज सिंहासन साह कलवारलगायतकाले पनि सम्बोधन गरेका थिए।