वीरगन्ज : वीरगन्जमा विश्वविद्यालय स्थापना हुनुपर्ने वीरगन्जवासीको झण्डै साढे दुई दशकदेखिको चाहना पूरा भएको छ । मधेस प्रदेश सरकारले वीरगन्जमा मधेस विश्वविधालयकाो स्थापना गरेसँगै वीरगन्जवासीको त्यो चाहना पूरा भएको हो ।
वीरगन्जमा विश्वविद्यालय स्थापनाका लागि २०५४ सालदेखि नै वीरगन्जवासीले अनवरत प्रयास गर्दै आएका थिए । २०६३ सालमा वीरगन्ज विश्वविधालय स्थापना र सञ्चालनका लागि यहाँका स्थानीय सरकार ,संघसंस्था र शिक्षाप्रेमीले रकम संकलन पनि गरेका थिए । तर, सरकारले अनुमति नदिँदा विश्वविधालय स्थापना र सञ्चालन गर्ने वीरगन्जवासीको चाहना पूरा हुन सकेको थिएन ।
अहिले भने मधेस प्रदेश सरकारले वीरगन्जमा मधेस विश्वविधालय स्थापना गरेको हो । बुधबार बेलुकी भव्य कार्यक्रम गरेर मधेस विश्वविधालयको उद्घाटन पनि गरिएको छ । पूर्वउपप्रधानमन्त्री एवं जनता समाजवादी पार्टी (जसपा)का राष्ट्रिय अध्यक्ष उपेन्द्र यादवले मधेस विश्वविधालयको उद्घाटन गरेका हुन् ।
वीरगन्जको श्रीपुरस्थित नेशनल ट्रेडिङको भवनमा मधेस विश्वविधालयको केन्द्रीय कार्यालय स्थापना गरिएको छ । विश्वविद्यालयको उपकुलपतिमा वीरगन्जकै प्राध्यापक डाक्टर दिपक शाक्यलाइ नियुक्त गरिएको छ । विश्वविधालयको भवन करिब १ सय बिघा जग्गामा निर्माण गरिने र त्यसका लागि जग्गाको खोजी भइरहेको उपकुलपति डाक्टर शाक्यले जानकारी दिए ।
शाक्यले भने,‘नेशनल ट्रेडिङको भवनममा विश्वविधालयको कार्यालय मात्रै सञ्चालन हुनेछ , भवन निर्माणका लागि करिब १ सय बिघा जग्गा वीरगन्ज आसपासमै खोजी रहेका छौं , जग्गा प्राप्त भएसँगै एकजना दाताले भवन निर्माणका लागि दुई सय करोड रुपैयाँ दान दिन तयार छन् ।
समुद्घाटन समारोहलाई सम्बोधन गर्दै उपकुलपति शाक्यले वीरगन्जमा विश्वविधालय स्थापना गर्ने वीरगन्जवासीको २५ वर्ष पहिला देखिको चाहना पूरा भएको बताए । उनले मधेस विश्वविधालयलाई अन्र्तराष्ट्रिय स्तरको नमूना विश्वविधालय बनाइने प्रतिबद्धता जनाए । उनले भने,‘यो विश्वविधालयमा अहिले अन्य विश्वविधालयमा चलिरहेका विषयभन्दा फरक विषयको पढाइने हुनेछ।'
शाक्यले मधेस विश्वविधालयको स्थापना मधेसको शिक्षाको इतिहासमा एउटा कोशे ढुङगा साबित हुने बताए । उनले भने ,‘यो मधेस सरकारको अहिलेसम्मकै सबैभन्दा उत्कृष्ट काम हो । विश्वविधालय स्थापनाले मधेसको राजनीतिक , सामाजिक , आर्थिक , सांस्कृतिक रुपान्तरणमा ठूलो टेवा पुग्ने जिकिर पनि उनले गरे ।
समुद्घाटन समारोहलाइ सम्बोधन गर्दै मधेसका मुख्यमन्त्री लालबाबु राउतले पनि वीरगन्जमा विश्वविधालय स्थापना गर्ने २०५४ साल देखिको वीरगन्ज्वासीको सोच अहिले मधेस सरकारले पुरा गरेको बताए ।
उनले भने,‘आज भन्दा २५ वर्ष पहिले नै वीरगन्जमा एउटा विश्वविधालय हुनुपर्छ भनेर हामी लागेका थियौं , त्यसका लागि अनवरत प्रयास पनि गरयौ तर सफल हुन सकिएन ,अहिले आएर वीरगन्जवासीको त्यो चाहना र सोच मधेस सरकारले पूरा गरेको छ ।
आजको युग विज्ञान र प्रविधिको युग भएकाले मधेस विश्वविधालयलाई विज्ञान र प्राविधिक शिक्षको हबका रुपमा विकास गर्न उनले सुझाव पनि दिए ।
कार्यक्रममा संघीय सरकारका वन तथा वातावरण मन्त्री प्रदीप यादवले वीरगन्जमा विश्वविधालय स्थापनाका लागि साढे दुई दशकदेखि आफूहरुले प्रयास गर्दै आएको भएपनि संघीय सरकारले नसुनेको गुनासो गरे । तर वीरगन्जमा विश्वविधालय स्थापना गर्ने वीरगन्जवासीको चाहना मधेस सरकारले सुनेको भन्दै उनले मधेस सरकार र मुख्यमन्त्री लालबाबु राउतको प्रशंसा गरे ।
यादवले भने ,‘वीरगन्जमा विश्वविधालय स्थापनाका लागि हरेक सरकारसँग हामीले पटक पटक हार गुहार लगायौं , भीख माग्यौं तर हाम्रो आवाज कसैले सुनेन आखिर सुन्यो त आफ्नै मधेस सरकारले , यहाँका मुख्यमन्त्री जीले अनि जसपाका राष्ट्रिय अध्यक्ष उपेन्द्र यादव जीले ।
मधेस विश्वविधालय स्थापना भएपनि यसलाई राम्रोसँग सञ्चालन गर्नका लागि ठूलो चूनौती रहेको पनि उनले बताए । यादवले भने,‘वीरगन्जमा नेपाल सरकारको कुनै लगानी छैन , यहाँको ठाकुरराम क्याम्पस , नारायणी रंगशाला , घण्टाघरलगायतका संरचनाहरु वीरगन्जवासी आफैले बनाएका हुन्, त्यसैले यो मधेस विश्वविधालय पनि अब वीरगन्जवासी आफैले सञ्चाल गर्छन् , विश्वविधालयको लागि जग्गा खोज्ने , भवन बनाउने र प्रविधिहरु जडान गर्ने लगायतका सबै काम हामी वीरगन्जवासी आफैले गर्छौं , चिन्ता लिनु पर्दैन ।'
विश्वविधालयको समुद्घाटन गर्दै पूर्व उपप्रधानमन्त्री एवं जसपाका राष्ट्रिय अध्यक्ष उपेन्द्र यादवले मधेस विश्वविधालयलाइ प्राविधिक जनशक्ति उत्पादन गर्ने नमूना शिक्षण संस्थाको रुपमा विकास गर्न सुझाव दिए ।
यादवले भने,‘विश्वविधालय धेरै छन् , तर घोकन्ते र रटन्ते शिक्षा मात्रै दिने ती विश्वविधालयहरु भन्दा फरक हुनुपर्छ मधेस विश्वविधालय , किन कि अहिलेको युग विज्ञान र प्रविधिको युग हो , यसैलाई मध्यनजर गरेर मधेस विश्वविधालय अगाडि बढ्नु पर्छ ।'
मधेस विश्वविधालयलाई केबल शैक्षिक प्रमाणपत्र बाँड्ने संस्था नबनाएर गुणस्तरीय शिक्षा प्रदान गर्ने शैक्षिक हबको रुपमा सञ्चालन गर्न उनले सुझाव दिए ।
समुद्घाटन कार्यक्रममा प्रदेश सरकारका सामाजिक विकास मन्त्री एंव मधेस विश्वविधालयका कुलपति नवलकिशोर साह , वीरगन्ज महानगरपालिकाका मेयर राजेशमान सिंह , वीरगन्ज उद्योग वाणिज्य संघका अध्यक्ष डाक्टर सुबोध गुप्ता , विभिन्न विश्वविधालयका उपकुलपति , शिक्षा विदलगायतको पनि सहभागिता थियो।
प्रतिक्रिया दिनुहोस !
