स्रोत नखुलेको नगद र ब्राउन सुगरसहित एक महिला पक्राउ
![स्रोत नखुलेको नगद र ब्राउन सुगरसहित एक महिला पक्राउ](https://annapurnapost.prixacdn.net/media/albums/11_20220918220854_UozSfJvYrO.png)
झापा : झापामा स्रोत नखुलेको साढे तीन लाख र ब्राउन सुगरसहित एक महिला पक्राउ परेका छन्।
पक्राउ पर्नेमा मेचीनगर नगरपालिका-१३ स्थित तेलीवारि निवासी ४३ वर्षीया भारती राजवंशी रहेको प्रहरी कार्यालय झापाका डीएसपी वसन्त पाठकले जानकारी दिए।
प्रहरीका अनुसार आइतबार साँझ ६ बजेको समयमा लागूऔषध नियन्त्रण ब्युरो काँकडभिट्टा र प्रहरी चौकी चारआलीबाट खटिएको संयुक्त प्रहरी टोलीले विशेष सूचनाको आधारमा ती महिलालाई शङ्का लागी चेकजाँच गर्दा उनको साथबाट ४ ग्राम ब्राउन सुगर बरामद गरेको थियो।
प्रहरीले पक्राउ गरी ती महिलालाई उनको घरमा लगेर खानतलासी समेत गरेका थिए। प्रहरीले उनको घरबाट ८ ग्राम ब्राउन सुगर, एक थान डिजिटल तराजु र नगद ३ लाख ५३ हजार ५ सय रुपैयाँ बरामद गरेको थियो।
यता ब्राउन सुगर र नगदसहित पक्राउ परेको महिलालाई आवश्यक कारबाहीका लागि इलाका प्रहरी कार्यालय धुलाबारीमा राखिएको डीएसपी पाठकले बताए।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)