लन्डन : आर्सनल इङ्लिस प्रिमियर लिग फुटबलको शीर्ष स्थानमा उक्लिएको छ। आइतबार भएको खेलमा सहज जित निकाल्दै आर्सनल शीर्ष स्थानमा उक्लिएको हो।
आइतबार भएको एकपक्षीय खेलमा आर्सनलले ब्रेन्टफोर्डलाई ३–० गोलले पराजित गर्यो। ब्रेन्टफोर्डको घरेलु मैदानमा भएको खेलमा आर्सनललाई जित दिलाउन विलियम सालिबा, गाब्रियल जिसस र फाबियो भियराले एक/एक गोल गरे।
खेलको १७औं मिनेटमा सालिबाले गोल गर्दै आर्सनललाई सुरुवाती अग्रता दिलाएका थिए। त्यसपछि २८औं मिनेटमा जिससको गोलमा आर्सनलले २–० को अग्रता बनायो। त्यसपछि खेलको ४९औं मिनेटमा फाबियोले गोल गर्दै आर्सनललाई ३–० को जित दिलाए।
जितसँगै आर्सनल लिगको शीर्ष स्थानमा उक्लिएको छ। आर्सनलले सात खेलमा १८ अंक जोडेको छ। आर्सनलले खेलेका सातमध्ये एक खेलमा मात्र पराजय बेहोरेको छ। सात खेलमा १७ अंक जोडेको म्यानचेस्टर सिटी दोस्रो स्थानमा छ। शुक्रबार राति भएको खेलमा सिटीले उल्भ्सलाई ३–० गोलले पराजित गर्दै तीन अंक जोडेको थियो।
यसैगरी लेस्टर सिटीलाई ६–२ ले पराजित गरेको टोट्टनहाम १७ अंकसहित तेस्रो स्थानमा छ। टोट्टनहाम गोल भिन्नतामा म्यानचेस्टर सिटीभन्दा पछि परेको हो। नौ अंक जोडेको ब्रेन्टफोर्ड भने नवौं स्थानमा छ।
प्रतिक्रिया दिनुहोस !
