राष्ट्रपति विधि र पद्धतिभन्दा बाहिर जानुभयो, राजीनामा दिनैपर्छ : उपेन्द्र यादव
असोज ५, २०७९ बुधबार १६:४८:०
हेटौंडा : जनता समाजवादी पार्टी (जसपा) नेपालका अध्यक्ष उपेन्द्र यादवले राष्ट्रपति विद्यादेवि भण्डारी गैरसंवैधानिक रुपमा अघि बढिरहेको टिप्पणी गरेका छन् ।
बागमती प्रदेशको राजधानी हेटौंडामा आयोजित एक समारोहलाई सम्बोधन गर्दै अध्यक्ष यादवले संसदको दुवै सदनबाट दोस्रोपटक स्वीकृत भइ पठाइएको नागरिकता विधेयक प्रमाणीकरण गर्न अस्वीकार गरेर राष्ट्रपति भण्डारीले संविधानको धज्जी उडाएको बताए ।
‘विधेयकलाई फेरबदल गर्ने अधिकार केवल संसदको हो । राष्ट्रपतिले पुर्नविचारको लागि संसदमा पठाउन पाउने अधिकार मात्रै संविधानले सुरक्षित गरेको छ । दोस्रोपटक पुनः दुवै सदनबाट स्वीकृत भइसकेको विधेयक प्रमाणीकरण नगरेर, उहाँले संविधान उल्लंघन गर्नुभयो, 'यादवले भने ।
राष्ट्रपतिको कदमले मुलुकमा दुरगामी असर पर्ने उनले बताए । ‘यसैगरी राष्ट्रपति अघि बढ्ने हो भने, भोलि आफूलाई मन नपरेको प्रधानमन्त्री भयो, म सपथ गराउँदिन भन्नुहोला, त्यसकारण यो उहाँको अराजकता हो ।’ यादवले भने, 'राष्ट्रपति र सरकारबीचको टकरावले मुलुकको शान्ति प्रक्रियामासमेत खलल पुर्याउँछ।'
उनले राष्ट्रपति भण्डारीले नेकपा एमालेको सामान्य कार्यकर्ताभन्दा माथि उठेर देश र जनताको लागि सोच्न नसकेको आरोप लगाए । ‘उहाँ विधि र पद्धतीभन्दा बाहिर जानुभयो । उहाँले घुँडा टेक्नैपर्छ । या, राजीनामा दिनुपर्छ ,' यादवले भने ।
उनले आफ्नो पार्टी समाजवादी लोकतन्त्र स्थापनाको लागि अघि बढेको बताए । समानता, स्वतन्त्रता र सम्पन्नतासहितको विभेदरहित सुन्दर र समृद्ध नेपाल निर्माण गर्ने एजेण्डा बोकेर आफ्नो दल निर्वाचनमा जाने उनले बताए ।
यादवले हेटौंडामा २५ मिटर सडक विस्तार गर्नुपर्ने आवश्यकता देखिएको भन्दै सरकारको ध्यानाकर्षण गराए ।
सडक क्षेत्रका घरधनीहरुको पहिचान गरी उचित मुआब्जा दिएर विस्तार कार्य तुरुन्तै प्रारम्भ गर्नुपर्ने उनको भनाइ छ ।
प्रतिक्रिया दिनुहोस !
