भक्तपुर : भक्तपुरको सूर्यविनायक चोकमा पर्यटक बोक्ने बसले ठक्कर दिंदा एकजना ७२ वर्षीया वृद्धाको मृत्यु भएको छ ।
सूर्यविनायक नगरपालिका वडा नं. ८ सूर्यविनायक चोकमा सल्लाघारीबाट जगातीतर्फ जाँदै गरेको बा. १ प. १५५१ नं. को पर्यटक बोक्ने बसले पैदलयात्री भक्तपुर नगरपालिका वडा नं. १ दुधपाटी बस्ने ७२ वर्षीया दिलमाया श्रेष्ठलाई ठक्कर दिएको थियो।
गम्भीर घाइते भएकी दिलमायालाई उपचारका लागि नजिकैको डा. इवामुरा अस्पताल लगेकोमा उपचारकै क्रममा मृत्यु भएको महानगरीय प्रहरी परिसर भक्तपुरले जनाएको छ ।
घटनास्थलमा प्रहरी वृत्त जगातीबाट अनुसन्धान अधिकृतसहितको प्रहरी टोली खटिई प्रारम्भिक अनुसन्धान भइरहेको जिल्ला पहरी परिसर भक्तपुरको सूचना अधिकृत राजु पाण्डेले जनाए ।
साथै ठक्कर दिने सवारी साधन र चालक सिन्धुपाल्चोक चौतारा साँगाचोकगढी नगरपालिका वडा नं. १ घर भई हाल काठमाडौं बालाजु बस्ने २९ वर्षीय बिनोद कार्कीलाई नियन्त्रणमा लिएको परिसरका सूचना अधिकृत पाण्डेले जनाए ।
घटनाबारे थप अनुसन्धान भइरहेको प्रहरीले जनाएको छ।
प्रतिक्रिया दिनुहोस !
