हेटौंडा: पूर्वपश्चिम राजमार्गअन्तरगत बारा जिल्लाको जीतपुर सिमरा उपमहानगरपालिका-२२ अमलेखगञ्जस्थित तीन नम्बर पुलमा बिहीबार बिहान भएको बस दुर्घटनामा परी ज्यान गुमाएका १६ मध्ये १२ जनाको सनाखत भएको छ ।
मृत्यु हुनेमा बाराको कलैया उपमहानगरपालिका वडा नम्बर– २ बस्ने वर्ष ४० का लिलाराज चौधरी, चितवनको खैरहनी नगरपालिका-५ बस्ने वर्ष ६३ की नन्दकुमारी पुडासैनी, चितवनकै कालिका नगरपालिका रमाइलो चोक बस्ने शंकर कंडेलका १४ वर्षीय छोरा सफल कँडेल रहेका छन् ।
सोही दुर्घटनामा परी खोलढुंगा बस्ने सुरक्षाकर्मी लालबहादुर बोगटी र धनुषाको जनकपुर ५ बस्ने ५० वर्षका सन्तोष कुमार रायको पनि मृत्यु भएको जिल्ला प्रहरी कार्यालय मकवानपुरका प्रहरी प्रवक्ता बलराम श्रेष्ठले अन्नपूर्ण पोष्ट्लाई जानकारी दिए । उनका अनुसार बाँकी ४ जनाको भने सनाखत हुन बाँकी छ ।
बसका चालक स्याङजा आदिखोला गाउँपालिका- ६ बस्ने वर्ष ४० का कोदिप्ति नारायण ढकालको भने हेटौंडाकै चुरेहिल अस्पतालमा उपचार भइरहेको र उनको अवस्था सामान्य रहेको प्रवक्ता श्रेष्ठले बताए ।
घटनास्थलमै ८ जनाको र उपचारको लागि हेटौंडाको चुरेहिल अस्पतालमा लगिएको ९ जनामध्ये २ जनाको मृत्यु भएको हो । उपचारको क्रममा ४ जनाको हेटौंडा अस्पतालमा मृत्यु भएको अस्पतालले पुष्टि गरेको छ । हेटौंडाकै मकवानपुर सहकारी अस्पतालमा लगिएका ६ जनामध्ये १ जनाको मृत्यु भएको र चितवनमा उपचारको क्रममा १ जनाको घाइतेको पनि मृत्यु भएको हो ।
नारायणगढबाट वीरगञ्जतर्फ जाँदै गरेको बा ०६–००१ ख ०११० नम्बरको बस तीन नम्वर पुलस्थित सडकखण्डबाट २० मिटर तल रहेको खोलामा खसेको थियो । बस आफै अनियन्त्रित भएर दुर्घटना भएको प्रहरीको प्रारम्भिक अनुसन्धानबाट खुलेको छ ।
हाल भरतपुरस्थित अस्पतालमा १९ जनाको र वीरगंजमा ९ जनाको उपचार भइरहेको छ । चुरेहिल अस्पतालमा २ जना, मकवानपुर सहकारी अस्पतालमा २ जना र हेटौंडा अस्पतालमा ३ जनाको उपचार भइरहेको छ । बसमा ५० जना सवार थिए ।
प्रतिक्रिया दिनुहोस !
