बारा बस दुर्घटनाः थप दुईजनाको मृत्यु, मृतकको संख्या १८ पुग्यो
असोज २१, २०७९ शुक्रबार ११:९:०
सिमराः बाराको तीन नम्बर पुलमा बिहीबार बिहान भएको बस दुर्घटनामा परी मृत्यु हुनेको संख्या १८ पुगेको छ । दुर्घटनामा गम्भीर घाइतेमध्ये थप दुईजनाको उपचारका क्रममा मृत्यु भएको हो ।
उपचारका क्रममा बिहीबार राती मृत्यु हुनेमा पर्सा सखुवाप्रसौनी गाउँपालिका ६ लखनपुरका ५५ वर्षीय गया राउत कम्कर र वीरगन्ज महानगरपालिका १६ नगवाकी ६० वर्षीय मालतदेवी चौरसिया रहेका छन् ।
कम्करको हेटौडा अस्पताल र चौरसियाको नारायणी अस्पताल वीरगन्जमा मृत्यु भएको बाराका प्रहरी प्रवक्ता राजेश थापाले जानकारी दिएका छन् ।
जीतपुरसिमरा उपमहानगरपालिका २२ का २८ वर्षीय सुरेश विक, कलैया उपमहानगरपालिका २ बस्ने ४१ वर्षीय लिलाराज चौधरी, कलैया उपमहानगरपालिका १० का २६ वर्षीय ईताजत अंसारी, सोही ठाउँकी ३६ वर्षीया नाजलिन खातुन, चितवन खैरहनी नगरपालिका ५ बुडौलीकी ६३ वर्षीया नन्दकुमारी पुडासैनी, चितवन कालिका नगरपालिका रमाईलो चोक बस्ने शंकर कडेलको १५ वर्षीय छोरा सफल कडेंल, वीरगन्ज महानगरपालिका १६ का ६५ वर्षीय सोमप्रसाद चौरसिया, सोही ठाँउकी ३६ वर्षीया मुन्नीदेवी चौरासिया, हेटौडा उपमहानगरपालिका ७ की ५६ वर्षीया शुभलक्ष्मी श्रेष्ठ, सोही ठाँउकी २० वर्षीया सोस्तीका श्रेष्ठ, ओखलढुंगाका लालबहादुर बोगटी, चितवन खैरहनी नगरपालिका ५ का २५ वर्षीय मनोरथ पुडासैनी, गोर्खाका ३५ वर्षीया अम्बिका कंडेल, जनकपुर उपमहानगरपालिका ५ का ५० वर्षीय सन्तोषकुमार राय, बारा करैयामाई गाँउपालिका घर भई भरतपुर नगरपालिका १२ बस्ने १६ वर्षीया प्रितिका चौधरी, बारा सुवर्ण गाँउपालिका ७ का ५५ वर्षीय रामआश्रय राय यादवको मृत्यु भएको थियो ।
बाराका प्रहरी प्रवक्ता थापाले थप दुई घाईतेको मृत्यु भएसँगै मृतकको संख्या १८ पुगेको र मृतकको शव परिवारले अस्पतालबाट बुझेर लगेको बताए । थापाले दुर्घटनामा परी घाइते भएका अन्य २६ जनाको विभिन्न अस्पतालमा उपचार भइरहेको जानकारी दिए ।
थापाका अनुसार पुरानो मेडिकल कलेज चितवनमा १४, चितवन मेडिकल कलेजमा पाँच, चुरेहिल अस्पताल हेटौडामा दुई, सहकारी अस्पताल हेटौडामा दुई, गण्डक अस्पतालमा दुई र हेटौडा अस्पतालमा एकजनाको उपचार भईरहेको थापाले जानकारी दिए । घाइतेमध्ये केही अवस्था गम्भीर रहेको थापाले जानकारी दिए ।
प्रतिक्रिया दिनुहोस !
