मकवानपुरमा एमालेले टुंग्यायो उम्मेदवार, कमल थापा पनि लविङ गर्दै
असोज २२, २०७९ शनिबार १६:१२:०
हेटौंडा: मंसिर ४ गते हुने प्रतिनिधिसभा र प्रदेशसभा सदस्य पदको निर्वाचनका लागि मकवानपुरको दुवै क्षेत्रमा नेकपा एमालेले उम्मेदवार तय गरेको छ ।
मकवानपुरमा राष्ट्रिय प्रजातन्त्र पार्टी (राप्रपा) नेपालसँग तालमेल गरी कमल थापालाई प्रतिनिधिसभा क्षेत्र नम्बर १ मा सघाउने चर्चाकाबीच एमालेले आफ्नै उम्मेदवार तय गरेको हो ।
सो क्षेत्रमा एमालेले रामेश्वर रानालाई टिकट दिएको एमाले मकवानपुरका अध्यक्ष एकलाल श्रेष्ठले बताए ।
त्यस्तै प्रदेश सभातर्फ १ (क) मा कमल विष्ट र १ (ख) मा एकलाल श्रेष्ठले टिकट पाएका छन् । त्यसैगरी प्रतिनिधिसभा क्षेत्र नम्बर– २ मा महेशकुमार बर्तौलाले टिकट पाउदा प्रदेश सभातर्फ (क) मा विष्णु ढकाल र (ख) मा लालबहादुर थापाले टिकट पाएका हुन् ।
एमाले मकवानपुरका केही नेताहरुले अध्यक्ष केपी ओलीसँग केही दिनअघि भेट गरी मकवानपुरमा राप्रपा नेपालको भोट नभएको र कमल थापालाई जिताउन सक्ने अवस्था नरहेको बताएका थिए ।
थापाले झण्डै एक महिनाअघिदेखि क्षेत्र नम्बर १ मा चुनाव लक्षित भेटघाट तथा विभिन्न कार्यक्रमलाई तीव्रता दिँदै आएका छन् । केही दिनअघि एमाले मकवानपुरले आयोजना गरेको चियापान कार्यक्रममा पनि थापा अतिथिको रुपमा सहभागी थिए ।
क्षेत्र नम्बर १ बाटै टिकट लिन थापाले एमाले नेतृत्वसँग लविङ गरिरहेको राप्रपा नेपालका एक नेताले बताए ।
प्रतिक्रिया दिनुहोस !
