दार्चुलाको छाङ्गरु र तिंकरमा हिमपात, जनजीवन प्रभावित
असोज २२, २०७९ शनिबार १६:५६:०
दार्चुला : तीन दिनदेखि लगातार परिरहेको वर्षापछि दार्चुलाको व्याँस गाउँपालिका–१ को छाङ्गरु र तिंकरमा हिमपात सुरु भएको छ । शुक्रबार बिहानबाटै हिमपात सुरु भएको हो ।
चीनको सीमा नजिकै रहेको तिंकर गाउँ र भारतीय अतिक्रमणमा रहेको कालापानी नजिकैको गाउँ छाङ्गरुमा हिमपात भएको हो ।
हिउँ पर्ने क्रम जारी रहेको जिल्ला प्रहरी कार्यालय दार्चुलाका प्रहरी निरीक्षक एवं प्रहरी प्रवक्ता राजेश शाहीले बताए ।
हिउँ पर्न थालेका कारण चिसो अत्यधिक बढेको छ । यो वर्ष पहिलो पटक गाउँमा हिउँ परेको हो । हिउँ परेपछि चौरी, झुपु, घोडा लगायतका गाईवस्तु चरिचरनमा समस्या भएको छ ।
चिसो बढेका कारण स्थानीय आगो तापेर दिन बिताउन बाध्य छन् । उच्च भू-भागमा वर्षाका कारण हिमपात सुरु भएको हो । यस्तै निरन्तरको वर्षाका कारण दार्चुलाका सबै भू-भागमा चिसो बढेको शाहीले बताए।
प्रतिक्रिया दिनुहोस !
