बझाङ : लगातारको वर्षाका कारण बैतडीको खोड्पेदेखि बझाङ जोड्ने जयपृथ्वी राजमार्ग अवरुद्ध भएको छ । राजमार्ग अन्तर्गत वित्थडचिर गाउँपालिकाको देउलेख, भारभिड, जयपृथ्वी नगरपालिकाको बाहुली खोला पक्की पुल नजिकै, दुर्गाथली गाउँपालिकाको झनाना बजार नजिकमा सडक पूर्ण अवरुद्ध भएको हो ।
यस्तै छबिसपाथिभेरा गाउँपालिका- १ जालेबगरमा पनि माथिबाट ढुंगा खस्ने र तलबाट सेती नदीले सडक कटान सुरु गरेकाले जोखिमयुक्त रहेको जिल्ला प्रहरी कार्यालय बझाङका सूचना अधिकारी कमलराज चौधरीले बताए । सडक अवरुद्ध हुँदा काठमाडौं, कञ्चनपुर, कैलाली, बैतडी र डडेल्धुराका लागि छुटेका सवारी साधन ठाउँ ठाउँमा रोकिएका छन् ।
सडक अवरुद्ध भएपछि बझाङका लागि छुटेका गाडी तथा यात्रु पनि बीच बाटामै अलपत्र परेका छन् । अवरुद्ध सडक खुलाउन प्रयास भइरहे पनि ठूलो पहिरो र लगातार पानी परिरहेकाले पन्छाउन समस्या भइरहेको प्रहरीले जनाएको छ ।
यसैबीच बुधबारदेखिको लगातारको वर्षाका कारण श्रीभावर नजिकै राष्ट्रिय प्रसारण लाइनको विद्युत अवरुद्ध भएको छ । विद्युत बन्द हुँदा बझाङबासीलाई शास्ती भएको छ । यहाँका सानाठूला कलकारखाना, सञ्चारमाध्यम सबै बन्द भएका छन् । नेपाल विद्युत प्राधिकरण वितरण केन्द्र बझाङकाच कार्यालय प्रमुख हरेन्द्रराय यादवले बझाङमा सडक अवरुद्ध भएकाले मर्मत गर्न जान नसकिएको डडेल्धुराबाट एक टोलीलाई खटाइएको जानकारी दिए ।
प्रतिक्रिया दिनुहोस !
