हेटौंडा : हेटौंडा-५ स्थित नेकपा एमालेको पार्टी कार्यालयमा आज दिउँसो देखिएको एउटा दृश्यले राजनीतिक बृत्तमा निकै चर्चा पायो।
एमालेको जनवर्गीय संगठन र आगामी मंसिर ४ गते हुने प्रतिनिधि सभा तथा प्रदेश सभा सदस्य पदका उम्मेदवारहरुबीच चुनावी रणनीति बनाउन एमालेले छलफल कार्यक्रम आयोजना गरेको थियो ।
कार्यक्रममा प्रतिनिधि सभा क्षेत्र नम्वर २ का उम्मेदवार महेश वर्तौला, एमाले मकवानपुरका अध्यक्ष एकलाल श्रेष्ठ, नेता रामचन्द्र राई, श्रीधर पोखरेल, अनन्त पौडेल, नेतृ जुनेली श्रेष्ठलगायतका एमालेबाट मनोनयन दर्ता गराएका उम्मेदवारहरु थिए ।
सोही कार्यक्रममा मकवानपुर क्षेत्र नम्वर १ मा सुर्य चिन्हबाट उम्मेदवारी दर्ता गराएका राप्रपा नेपालका अध्यक्ष कमल थापा अतिथिको रुपमा सहभागी थिए ।
छलफल कार्यक्रमपश्चात कमल थापाले फूल माला लगाएर नेकपा माओवादी केन्द्रका जिल्ला कार्यसम्पादन समितिका सदस्य शंकर राउतलाई एमालेमा स्वागत गरे । सो दृष्यले राजनीतिक वृत्तमा निकै चर्चा पाएको छ ।
कार्यक्रममा करिब २० मिनेट सम्बोधन गरेका उनले एमाले अध्यक्ष केपी ओली र मकवानपुर इन्चार्ज रामेश्वर रानाको प्रशंसा गरे । उनले कार्यक्रमलाई सम्बोधन गर्दै राष्ट्रवादी शक्ति कमजोर भइरहेको अवस्थामा राष्ट्रको हितका लागि सुर्य चिन्हबाट उम्मेदवारी दिएका सबै उम्मेदवारले जित्नुपर्ने बताए ।
उनले एमाले नेता राना अन्यन्तै जिम्मेवार र इमान्दार नेता भएको दावी गरे । रानालाई अन्याय हुन नहुने भन्दै थापाले एमालेले उनलाई अझै राम्रो जिम्मेवारी दिने बताए ।
प्रतिक्रिया दिनुहोस !
