जोमसोम : आसन्न मंसिर ४ गते हुने प्रतिनिधि र प्रदेशसभा निर्वाचनका लागि हिमाली जिल्ला मुस्ताङका ३९ मतदान केन्द्रमा २ सय ९३ जना कर्मचारी खटाइने भएको छ। निर्वाचन आयोगले तोकेको मतदान केन्द्रका मतदाता संख्या बमोजिम मुस्ताङका मतदान केन्द्रमा उक्त संख्यामा कर्मचारी खटाइने तयारी भइरहेको जिल्ला निर्वाचन कार्यालय मुस्ताङले जनाएको छ।
निर्वाचन आयोगले २ सय ५० जना मतदाता भएको मतदान केन्द्रमा ७ जना कर्मचारी र २ जना स्वंयसेवक, २ सय ५१ देखि ५०० जना मतदाता भएको मतदान केन्द्रमा ८ जना कर्मचारी र ३ जना स्वंयसेवक र ५ सय ०१ जनाभन्दा बढी मतदाता रहेको मतदान केन्द्रमा ८ जना कर्मचारी र ४ जना स्वंयसेवक खटाउन निर्देशन भएको जिल्ला निर्वाचन कार्यालय मुस्ताङका प्रमुख मदन अर्यालले जानकारी दिए।
निर्वाचन आयोगले तोकेको मापदण्ड अनुसार मुस्ताङका ३९ वटा मतदान केन्द्रमा ३९ जना मतदान अधिकृत र ३९ जना सहायक मतदान अधिकृत खटाइने छ। यस्तै, मतदान केन्द्र र मतदाता संख्याको आधारमा मुस्ताङका ३९ वटै मतदान केन्द्रमा १ सय ३९ जना सहयोगी कर्मचारी र ३९ जना सहयोगी खटाइने भएको छ। यसका अलावा निर्धारण गरिएका कर्मचारीबाहेक १ सय ०३ जना स्वंयसेवक खटाइने छ ।
समानुपातिक निर्वाचन प्रणाली अन्र्तगतका अस्थायी मतदान केन्द्रमा ४ जना कर्मचारी र १ जना स्वंयसेवक खटाइने व्यवस्था गरिएको छ। मुस्ताङका मतदान केन्द्रमध्ये ५ वटा मतदान केन्द्र ५ सयभन्दा बढी मतदाता रहेको जिल्ला निर्वाचन कार्यालयका सूचना अधिकारी समीर थापाले जानकारी दिए।
प्रतिक्रिया दिनुहोस !
