काठमाडौं: 'प्रेम र युद्धमा सबै जायज' भन्ने युक्ति नेपालको राजनीतिमा पनि लागू भएको देखिन्छ । हुन पनि बाम गठबन्धनबाट बहुमत मत ल्याएर सरकारमा पुगेका तत्कालीन नेकपा एमाले र नेकपा माओवादी केन्द्रले पार्टी एकीकरण गर्दै ठूलो दल नेकपा गठन गरे पनि ठूलो भनिएको दल लामो समयसम्म एउटै व्यानरमा टिक्न सकेन ।
शीर्ष नेताबीचको आन्तरिक विवादले फेरि टुक्रिएको नेकपा पहिलेकै दुई दलमा विभक्त भयो । अनि नेकपा एमाले र नेकपा माओवादी केन्द्र बने । यी दुई दलबीचको जुटफूटको राजनीतिले आगामी मंसिरमा हुने निर्वाचनमा आफ्नै पूर्वसहकर्मीको रोचक भिडन्त हुने भएको छ । सहकर्मी हुँदा एकले अर्काको भूमिकाको तारिफ गरेर नथाक्ने नेता अहिले आफ्नै साथीका कुरा काट्दै भोट भाग्दैछन् ।
राजनीतिक दलका नेताको यो प्रवृत्तिले पनि यसपालिको निर्वाचन केही रोचक बनाएको छ । नेपाली राजनीतिमा शीर्ष मानिएका नेता तथा स्थानीय नेताबीच पनि आगामी प्रतिनिधिसभा निर्वाचनमा प्रतिस्पर्धा हुँदैछ । यस्तो प्रतिस्पर्धाको रोचक दृश्य इलाम, झापा, उदयपुर, सिन्धुली, रौतहट, काठमाडौं, गुल्मी, दाङ, दैलेख, कैलाली, डोल्पालगायतका जिल्लामा देखिएको छ ।
यस्तो रोचक भिडन्तमा नेकपा एकीकृत समाजवादी, नेकपा माओवादी केन्द्र र नेकपा एमालेका उम्मेद्वारबीच हुनेछ । धेरै ठाउँमा एमाले र एकीकृत समाजवादीका नेताबीच प्रतिस्पर्धा छ ।
नेकपा एकीकृत समाजवादीका अध्यक्ष नै रहेका माधवकुमार नेपाल आफ्नै पूर्वसहकर्मी एमाले नेता अजयकुमार गुप्तासँग प्रतिस्पर्धा गर्दैछन् ।
रौतहटको निर्वाचन क्षेत्र नम्बर १ मा लामो समय एमालेबाट प्रतिनिधित्व गरेका नेताबीचको जुहारी रोचक हुने अपेक्षा गरिएको छ । एकीकृत समाजवादीको अध्यक्ष नै भए पनि माधव नेपाललाई एमालेको मत तान्न कठिन हुने स्थानीय बताउँछन् । विगतमा एमालेको नेतृत्व तहमा रहेका तथा देशकै नेतृत्व गरेका नेता नेपाललाई नयाँ पार्टी सम्हालेपछि जनताले कस्तो सम्बोधन गर्छन त्यो चुनावी परिणामले देखाउने छ ।
विगतमा एमालेका अध्यक्ष तथा एमालेबाटै प्रधानमन्त्री बनेका नेकपा एकीकृत समाजवादीका नेता झलनाथ खनाललाई पनि आफ्नै पूर्वसहकर्मीले टक्कर दिँदैछन् । इलामको निर्वाचन क्षेत्र नम्बर १ मा नेता खनाल र नेकपा एमालेका जिल्ला अध्यक्ष महेश बस्नेतबीच कडा प्रतिस्पर्धा हुने देखिन्छ । सत्ता गठबन्धनबाट उम्मेद्वार बनेका खनाललाई यसअघि इलाम नगरपालिकाको प्रमुख भएर काम गरेका जिल्ला अध्यक्ष बस्नेतले टक्कर दिनेछन् ।
निर्वाचन प्रचारमा होमिएका खनालले अन्तिम पटक भन्दै मत मागे पनि अब नयाँ अनुहारलाई ठाउँ दिनुपर्ने आह्वानसँगै बस्नेत पनि मैदानमा छन् । विगतका निर्वाचनमा इलाम-१बाटै सांसद बन्दै आएका खनालको यो वर्ष अग्नि परीक्षा हुने खनालकै पूर्वसहकर्मी एमालेका स्थानीय नेताको भनाइ छ । खनाललाई विगतको एमालेको मत तथा अहिले केही रुष्ट कांग्रेसजनको मत तान्न कठिन छ । निर्वाचनमा विजयी भएपछि जिल्ला बिर्सने आरोप खेपिरहेका खनाललाई स्थानीय तहबाटै काम गरिरहेका बस्नेतले निक्कै दबाबमा राख्नेछन् ।
रौतह, इलामसँगै अन्य जिल्लामा पनि पूर्वसहकर्मीबीचको टक्कर निक्कै राम्रो हुने आँकलन गरिएको छ । धेरै चर्चामा रहेको जिल्लामा गुल्मीको नाम पनि आउँछ । गुल्मीमा एमाले नेता गोकर्ण विष्ट र नेकपा एकीकृत समाजवादीकी नेतृ रामकुमारी झाँक्री दुवैको नाम धेरै चर्चामा छ ।
दुवै पूर्वमन्त्री, मन्त्री हुँदाका कामले गोकर्ण बढी चर्चामा आए । अनि रामकुमारी झाँक्री विद्यार्थी राजनीतिबाटै चर्चा बटुलेकी नेतृ । दुवैले संगठन विस्तारमा गुल्मीमै काम गरेका अहिले एकै गाउँमा झण्डै उस्तै उस्तै चुनावी प्रचार शैली लिएर मतदाता समक्ष जाँदैछन् । रामकुमारीलाई सत्ता गठबन्धनले साथ दिँदा एमालेको एक्को उम्मेद्वार विष्टमा को कता पल्लाभारी हुने भन्नेबारे बेग्लाबेग्लै टिकाटिप्पणी हुने गरेको छ । परिणाम कुर्न समय पर्खनुपर्ने भए पनि दुईबीचको भिडन्त गुल्मी क्षेत्र नम्बर २ मा निक्कै रोचक हुने एमालेका नेताहरूको आँकलन छ ।
दाङको क्षेत्र नम्बर १ मा एमालेका शान्ता चौधरी र मेटमणी चौधरीको प्रतिस्पर्धा पनि रोमाञ्चक हुने आँकलन गरिएको छ । एकै समूदायका यी दुई पूर्वसहकर्मीले आफूलाई अब्बल देखाउने अभियानसहित चुनावी मैदानमा रहँदा परिणाम के आउने भन्ने यकीन आँकलन अहिले छैन । तर दुवैले आफ्नो जितको सुनिश्चितता दाबी गरेका छन् । एमालेको सचेतकको भूमिकामा रहेकी चौधरी राम्रो अवसर पाउने नेतृ हुन् । यता शहरी विकास मन्त्रीसमेत रहेका नेता मेटमणि चौधरी सत्ता गठबन्धनको व्यानरमा नेकपा एकीकृत समाजवादीको तर्फबाट चुनावी मैदानमा छन् ।
काठमाडौं क्षेत्र नम्बर ८ मा पनि पूर्वसहकर्मीबीचको भिडन्त हुँदैछ । नेकपा एकीकृत समाजवादीका जीवनराम जीवनराम श्रेष्ठ एमालेमा हुँदा शिवसुन्दर राजवैद्यका सहकर्मी हुन । धेरै चर्चामा नआएका राजवैद्यले एमालेबाट सत्ता गठबन्धनको उम्मेदवार बनेका श्रेष्ठलाई राम्रै ठक्कर दिने मतदाताको विश्लेषण छ ।
झापा २ मा पनि पूर्वएमालेबीच प्रतिस्पर्धा हुँदैछ । माओवादी केन्द्रबाट हरिकुमार रानामगर र एमालेबाट देवराज घिमिरे भिड्दैछन् । हरिकुमार एमालेबाट माओवादी केन्द्रमा प्रवेश गरेर उम्मेद्वार बनेका हुन् ।
सिन्धुली २ मा पूर्वमाओवादीद्वय लेखनाथ दाहाल र मनोजजंग थापाबीच कडा टक्कर हुने देखिन्छ । लेखनाथ माओवादीबाट सत्ता गठबन्धनका उम्मेदवार हुन् भने पूर्वमाओवादी केन्द्रका मनोजजंग एमालेबाट उम्मेदवार बनेका छन् ।
उदयपुरको निर्वाचन क्षेत्र नम्बर २ मा पनि पूर्व एमालेबीच चुनावी प्रतिस्पर्धा हुँदैछ । सो क्षेत्रमा नेकपा एकीकृत समाजवादीका उपमहासचिव जगननाथ खतीवडा र एमाले नेता अम्बरबहादुर रायमाझी लड्दैछन् । खतिवडा सत्ता गठबन्धनका उम्मेदवार हुन् ।
डोटीको निर्वाचन क्षेत्र नम्बर १ मा पूर्व एमालेबीच चुनावी प्रतिस्पर्धा हुनेछ । नेकपा एकीकृत समाजवादीबाट पूर्वपर्यटन मन्त्री प्रेमबहादुर आले र एमालेबाट गौरी वली चुनावी मैदानमा छन् ।
कैलालीको निर्वाचन क्षेत्र नम्बर ३ मा सँगै नेकपा माओवादी केन्द्रमा रहेका गौरीशंकर चौरी र कृष्ण चौधरीपनि चुनावमा भिड्दैछन् । गौरीशंकर एमालेबाट र कृष्ण माओवादी केन्द्रबाट चुनावी मैदानमा उत्रिएका हुन् । गौरीशंकर पूर्वकृषि विकास मन्त्री हुन् भने कृष्ण पूर्वसभासद् हुन् ।
एक मात्र निर्वाचन क्षेत्र रहेको डोल्पाबाट उम्मेदवारी दिएका पूर्वसहकर्मी धनबहादुर वुढा र गणेशबहादुर शाहीबीच पनि रोचक प्रतिस्पर्धा हुँदैछ । नेकपा एकीकृत समाजवादीका धनबहादुर पूर्वपर्यटन राज्यमन्त्री हुन् भने एमालेबाट उम्मेदवारी दिएका शाही ठूली भेरी नगरका पूर्वप्रमुख हुन् ।
पूर्वसहकर्मीद्वय एमालेका अम्मरबहादुर थापा र रवीन्द्रराज शर्मा दैलेख १ बाट चुनावी दौडमा छन् । नेकपा एकीकृत समाजवादीका थापा र एमालेका शर्मा चुनावमा लड्दैछन् । थापा नेकपा एकीकृत समाजवादी कर्णाली प्रदेशका अध्यक्ष हुन् भने शर्मा एमाले दैलेखका प्रभाव जमाएका नेतामा पर्छन् ।
जे भए पनि अब जनताले आफ्नो योग्य उम्मेदवारलाई जिताउने एक मौका आएको छ । चर्चालाई छाडेर देशको विकास र समृद्धिका लागि अघि बढ्ने जिम्मेवारी बहन गर्न सक्ने नेता छान्ने युवा मतदाताहरूको भनाइ छ ।
प्रतिक्रिया दिनुहोस !
