काठमाडौं : नेपाली खेल जगतले पाएका सबैभन्दा ठूला स्टार हुन्, क्रिकेटर सन्दीप लामिछाने । अहिले तीनै ग्लोबल स्टारमाथि नाबालिग बलात्कारको आरोप लागेर अनुसन्धान भइरहेको छ । शुक्रबार सम्पन्न थुनछेक बहसपछि राष्ट्रिय क्रिकेट टिमका निलम्बित कप्तान सन्दीपलाई पुर्पक्षका लागि थुनामा राख्न केन्द्रीय कारागार पठाइएको छ । मुद्दाको किनारा नलागेसम्म सन्दीप कारागारमै रहनेछन्।
भलै नेपालको सन्दर्भमा खेल क्षेत्रबाट यौन दुर्व्यवहारको विषयमा बाहिरिएको यो पहिलो घटना हो । नेपालमा फाट्ट–फुट्ट यौन दुर्व्यवहारको चर्चा, किस्सा बाहिरिने गरे पनि आरोपितलाई कठघरामा उभ्याउने यो पहिलो घटना नै हो । तर, विश्व खेल जगतमा बलात्कार तथा यौन दुव्र्यवहारका घटना समय–समयमा आइरहन्छन् ।
सुपर–स्टार फुटबलर क्रिस्टियानो रोनाल्डोदेखि बक्सर माइक टाइसन, बास्केटबलका स्टार कोबे ब्रायन्ट, हक्कीका बेन जोन्सोनसम्मलाई बलात्कारको आरोप लागेको थियो । यीमध्ये धेरै आरोप सावित भएनन् । तर, केही मुद्दाले भने करिअरको उत्कर्षमा रहेका खेलाडीलाई कारागारमा खाँदेको थियो । बलात्कारको आरोप लागेका पाँच स्पोर्ट्स स्टारहरु:
क्रिस्टियानो रोनाल्डो
सन् २०१७ को अप्रिलमा रोनाल्डोमाथि बलात्कारको आरोप लागेको थियो। जर्मन जर्नल डेर स्पाइगेलले क्याथरिन मायोर्गाले रोनाल्डोमाथि लगाएको बलात्कारको आरोप र उनीहरुबीच अदालतभन्दा बाहिर भएको सम्झौता पत्र प्रकाशित गरेको थियो । त्यसबेला सार्वजनिक भएको सम्झौता पत्रमा ३ लाख ७५ हजार डलर लिएर मायोर्गाले त्यो आरोप बाहिर नलिने शर्तमा हस्ताक्षर गरेकी थिइन् ।
तर, मायोर्गाले २०१८ मा चलेको ‘मि टू’ मुभमेन्टताका त्यो घटना बाहिर ल्याउने निर्णय गरेकी थिइन् । उनले सन् २००९ को जुन १३ मा लस भेगासको प्रहरी कार्यालयमा उजुरी दिएकी थिइन् । त्योभन्दा अघिल्लो रात रोनाल्डोले आफूलाई एक नाइट क्लबमा भेटेर बलात्कार गरेको उनले बताएकी थिइन् । जहाँ रोनाल्डो देखिएका थिए ।
म्यासन ग्रिनउड
सामाजिक सञ्जालमा एक महिलाले पोस्ट गरेको भिडियो र तस्बिरहरुको आधारमा म्यानचेस्टर पुलिसले ग्रिनउडलाई पक्राउ गरेको थियो । ग्रिनउडकी प्रेमिकासमेत रहेकी ती महिलाले आफूलाई यौन दुव्र्यवहार, बलात्कार गरेको र त्यसको प्रतिवाद गर्दा कुटेको बताउँदै भिडियोसहित निलडाम र रगत बगिरहेका तस्बिर सार्वजनिक गरेकी थिइन् ।
सन् २०२२ को जनवरी ३० मा पक्राउ परेका म्यानेस्टर युनाइटेडका फरवार्ड केही समयपछि जमानतमा रिहा भएका थिए । जमानतमा रिहा हुँदा राखिएका शर्त उल्लंघन भएपछि फेरि पक्राउ परेका ग्रिनउड गत महिना फेरि छुटेका छन् । यद्यपि, उनीमाथि अनुसन्धान जारी छ ।
नेइमार
बलात्कारको आरोपमा ब्राजिलियन फुटबलर नेइमार पनि अछुतो रहन सकेनन्। सन् २०१९मा नेइमारमाथि नाजिला ट्रिनिडाड नाम गरेकी मोडलले बलात्कार र हिंसाको आरोप लगाएकी थिइन् ।
सामाजिक सञ्जालमा एक भिडियो पोस्ट गरेर आफूमाथि बलात्कार भएको दाबी गरेकी ती महिलाले अन्ततः आफूले नेइमारलाई ब्ल्याकमेल गर्न त्यसो गरेको स्वीकार गरेकी थिइन् ।
माइक टाइसन
चर्चित बक्सर माइक टाइसनले बलात्कारको आरोप प्रमाणित भएर तीन वर्ष कारागारमा विताएका थिए । सन् १९९१ मा डेजिरी वासिङ्टन नाम गरेकी एक मोडेलले उनीमाथि बलात्कारको आरोप लगाएकी थिइन् ।
इन्डियानामा भएको फैसलाले उनलाई दोषी सावित गर्दै तीन वर्ष कैदको सजाय सुनाएको थियो ।
कोबे ब्रायन्ट
बास्केटबलका सुपर–स्टार कोबेमाथि सन् २००३ मा बलात्कार र यौन दुव्र्यवहारको आरोप लागेको थियो । कोलोराडो होटलकी एक १९ वर्षीया कामदार महिलालाई बलात्कार गरेको मुद्दा दर्ता भएको थियो । करिब एक वर्षसम्म चलेर पीडितले अदालतमा हाजिर हुन अस्वीकार गरेपछि मुद्दा खारेज भएको थियो ।
यस्तै विश्व फुटबलकै महान्मध्ये एक डिएगो म्याराडोनाको जीवन काण्डै–काण्डले भरिएको थियो । तर, तीमध्ये सबैभन्दा विवादास्पद काण्ड उनीमाथि लागेको यौन दुव्र्यवहारको आरोप थियो । नेक्सोफिन नामक एक वेबसाइटले म्याराडोनामाथि त्यो आरोप लगाउँदै म्याराडोना कट्टु मात्रै लगाएर दुई अर्धनग्न एकदमै कम उमेरका केटीसँग भएको तस्वीर सार्वजनिक गरेको थियो ।
तर, उनीमाथि बलात्कारको औपचारिक आरोप वा उजुरी परेन । तर, मायस अल्भारेज नाम गरेकी एक महिलाले आफू १६ वर्षकी हुँदा म्याराडोनासँग शारीरिक सम्बन्ध भएको दाबी गरेकी थिइन् ।
प्रतिक्रिया दिनुहोस !
