जोमसोम : मंसिर ४ गते हुने प्रतिनिधि र प्रदेशसभा निर्वाचनका लागि मुस्ताङमा मतदान केन्द्र धमाधम निरीक्षण भइरहेको छ।
आइतबार मुस्ताङका प्रमुख जिल्ला अधिकारी नेत्रप्रसाद शर्मा सहितको सुरक्षाकर्मी लगायतको टोलीले मुस्ताङको वारागुङ मुक्तिक्षेत्र-५ पर्ने शान्ता गाउँको मतदान स्थलको निरीक्षण गरेका छन्।
मुस्ताङ र डोल्पाको सीमावर्ती क्षेत्र शान्ता गाउँमा पर्ने हिमाली आधारभूत विद्यालय मतदान केन्द्रको प्रजिअ शर्मासहित मुख्य निर्वाचन अधिकृत ईश्वर पराजुली ,नेपाली सेना, सशस्त्र प्रहरी र नेपाली प्रहरी लगायतको टोलीले संयुक्त निरीक्षण गरेका हुन्।
मुस्ताङका ३९ मतदान केन्द्रमध्ये यो सबैभन्दा विकट र दुर्गम स्थानमा पर्छ। आइतबार मुस्ताङका प्रजिअ शर्मासहितको टोलीले शान्ता जोड्ने सडकको हिउँ पन्छ्याउँदै मतदान कैन्द्रको निरीक्षण गरेका हुन्।
दसैं अघिको प्रतिकुल मौसम र उच्च हिमाली क्षेत्रमा अत्यधिक चिसो बढेसँगै मुस्ताङ डोल्पा जोड्ने निर्माणधीन कच्ची सडकमा दुई फिट हिउँको थियो।
वारागुङ मुक्तिक्षेत्र-५ का वडाध्यक्ष सुरेन्द्र गुरुङले सडकको हिउँ पन्छ्याउँदै प्रजिअसहितको टोली मतदान केन्द्र निरीक्षण गर्न आएको जानकारी दिए। उच्चस्थानबाट सडक मार्ग विस्तार भएकाले मुस्ताङ-डोल्पा सडकमा बरफ जम्न सुरु भइसकेको वडाध्यक्ष गुरुङले बताए।
प्रतिक्रिया दिनुहोस !
