ओली फेरि सुदूरपश्चिममा, डोटी र कैलालीका चुनावी सभालाई सम्बोधन गर्ने
कात्तिक २६, २०७९ शनिबार १३:५१:०
धनगढी: नेकपा (एमाले) का अध्यक्ष केपी शर्मा ओली चुनावी सभा सम्बोधनका लागि दोस्रो पटक सुदूरपश्चिम पुगेका छन् ।
ओलीले आज डोटीको दिपायल, एमालेका सचिव लेखराज भट्ट लडेको कैलाली निर्वाचन क्षेत्र नम्बर ४ को अत्तरिया र झपट रावल लडिरहको कैलाली कै निर्वाचन क्षेत्र नम्बर २ को लम्कीमा आयोजित चुनावी सभालाई सम्बोधन गर्नेछन ।
ओली चुनावी सभा सम्बोधनका लागि दोस्रो पटक सुदूरपश्चिम आएका हुन । यसअघि कार्तिक १८ गते ओलीले दार्चुलाको खलंगाबाट आफ्नो चुनावी प्रचारप्रसार सुरु गरेका थिए । उनले एकै दिनमा बैतडीको पाटन र कञ्चनपुरको महेन्द्रनगरको चुनावी सभा पनि सम्बोधन गरेका थिए । दार्चुलाबाट प्रतिनिधि सभामा एमालेका गणेश सिह ठगुन्ना, बैतडीबाट पार्टीका सुदूरपश्चिम प्रदेश अध्यक्ष दामोदर भण्डारी र कञ्चनपुर ३ बाट निरुदेबी पाल एमालेबाट चुनावी मैदानमा छन ।
पूर्वप्रधानमन्त्री ओलीले दार्चुलामा चुनावी कार्यक्रम गरे लगत्तै सत्ता गठबन्धनले पनि दार्चुलाको गोकुलेश्वर, बैतडीको पाटन र कैलालीको सुखडमा चुनावीसभाको आयोजना गरेको थियो ।
सुदूरपश्चिमको चुनावी सभामा चुच्चे नक्सा चुनावी मुद्दा बनेको छ । मुख्य राजनीतिक दल नेकपा एमाले, नेपाली कांग्रेस र नेकपा माओवादी केन्द्रका शीर्ष नेताले कालापानी, लिपुलेक र लिम्पियाधुरा समेटेर जारी गरिएको नयाँ नक्साको स्वामित्व ग्रहण गर्न हानाथाप गरिरहेका छन ।
सर्वसम्मत रूपमा प्रतिनिधिसभाबाट नयाँ नक्सा अनुमोदन भएता पनि तीनै दलका शीर्ष नेताहरूले त्यसको श्रेय लिन अग्रसर भएका छन्। उक्त नक्सालाई तीनै दलका शीर्ष नेताहरूले चुनावी एजेन्डा बनाएका छन्।
प्रतिक्रिया दिनुहोस !
