बेंसीसहर : लमजुङमा निर्वाचनका लागि कर्मचारी र सामाग्री मतदान केन्द्रमा पठाएसँगै मतपेटिका राख्ने र मतगणना स्थल तयार पारिएको छ। मुख्य निर्वाचन अधिकृतको कार्यालयले मतपेटिका राख्ने र मतगणना स्थल जिल्ला समन्वय समितिको सभाहलमा तयार पारेको छ।
सो स्थानमा सुरक्षा चुनौतीलाई मध्यनजर गरेर तारजाली र सीसीटीभी क्यामरा जडान गरिएको मुख्य निर्वाचन अधिकृत शिवप्रसाद खनालले बताए।
मतपेटिका राख्नका लागि चारवटा कोठा तयार पारिएको छ। मतगणनास्थलमा दलका उम्मेदवार र प्रतिनिधिलाई बस्ने व्यवस्था तारजालीभन्दा बाहिर बनाइएको छ। मतदानस्थलमा हुने असुरक्षा र हुनसक्ने धाँधलीलगायतका काम रोक्न तारजाली र सीसीक्यामराबाट निगरानी गर्नुपरेको मुख्य निर्वाचन अधिकृत खनालले बताए।
प्रमुख जिल्ला अधिकारी सुशील वैद्यले मतपेटिका राख्ने र मतगणना हुने स्थानको सुरक्षा व्यवस्था मजबुत बनाइएको बताए। ‘मतपेटिका राख्ने र मतगणना स्थलमा सुरक्षा चुनौती हुन्छ। मतगणना निकै संवेदनशील हुन्छ। मतपेटिकालाई सुरक्षित राख्नु हाम्रो कर्तव्य हो,’ प्रजिअ वैद्यले भने।
सीसीक्यामरा जडानका लागि बेंसीसहर नगरपालिकाले ४ लाख ५० हजार रुपैयाँ सहयोग गरेको छ। स्थानीय तह निर्वाचनमा पनि क्यामरा जडान गरिएको थियो। तारजाली सिँचाइ कार्यालयले सहयोग हो।
२०७४ को स्थानीय तह चुनावमा भरतपुरमा मतपत्र च्यातेको घटनापछि आयोगले तारजालीको व्यवस्थापनमा मतगणना गर्दै आएको छ। सीसीक्यामरा मार्फत आयोगले सिधै मतगणना स्थलको निरिक्षण गर्न मिल्ने व्यवस्था मिलाइएको सहायक निर्वाचन अधिकृत विश्वराज कुइँकेलले बताए।
लमजुङका प्रत्येक निर्वाचन केन्द्रमा कर्मचारी र सामग्री पुगिसकेको छ भने राजनीतिक दल र उम्मेदवारको प्रचारप्रसारको अवधि पनि सकिएको छ। बाहिर रहेका मतदाताहरु मत खसाल्न जिल्ला भित्रिने क्रम जारी छ। जिल्लामा १ लाख ३३ हजार ५ सय ५९ जना मतदाता रहेका छन्।
लमजुङमा प्रतिनिधिसभा सदस्यका लागि एमाले उपमहासचिव पृथ्वीसुब्बा गुरुङ र माओवादी केन्द्रका महासचिव देवप्रसाद गुरुङसहित ९ जना चुनावी मैदानमा रहेका छन्।
जिल्ला समन्वय समितिको हलमा बनाएको तारजालीसहितको मतगणनास्थल। तस्बिर : नवीनराज कुइँकेल
प्रतिक्रिया दिनुहोस !
