सोलुखुम्बु : सोलुखुम्बुको खुम्बु पासाङ ल्हामु गाउँपालिका ४ को माथिल्लो क्षेत्रको मतपेटिका ढुवानीमा चुनौती देखिएको छ । अत्याधिक चिसोका कारण मतपेटिका फुट्ने र मतपेटिकामा प्रयोग गरिएको सिल आफै भाँचिने सम्भावना रहेको मतदान अधिकृतले बताएका छन् ।
जिल्लाको सबैभन्दा अग्लो स्थान ४ हजार मिटर उचाईको मतपेटिका सिल गर्ने क्रममा चिसोले भाँचिने समस्य भएपछि केहि समय तातो पानीमा ढुबाएर सिल गरिएको थियो । तर ढुवानीको क्रममा ति सिलहरु भाँचिन सक्ने भएकाले अत्यन्त चुनौती रहेको निर्वाचन अधिकृत ङवाङ दोर्जी बाहिङले बताए ।
उक्त मतदान केन्द्रबाट भरियामार्फत नाम्चेसम्म मतपेटिका ढुवानी गर्नुपर्ने भएकाले थोरै प्रेसर पर्दा समेत चिसोले फुट्ने र भाँचिने सम्भावना हुने उनको भनाई छ । उनका अनुसार ३८४ जना मतदाता रहेको पाङबोचे मतदान केन्द्रमा १५९ मत अर्थात ४१.४० प्रतिशत मत खसेको छ ।
खुम्बुको वडा नम्बर १ क्षेत्रको दुई वटा केन्द्रका मतपेटिका गाडीमार्फत मतगणना स्थल सल्लेरी ल्याइएको छ भने बाँकी ९ वटा केन्द्रको पेटिका आज हेलिकप्टर मार्फत ल्याउने तयारी गरिएको छ । खुम्बु पासाङ ल्हामु गाउँपालिकामा ५ हजार ९ सय ८७ मतदातामा २ हजार ६ सय ४७ अर्थात ४४.२१ प्रतिशत मत खसेको छ ।
प्रतिक्रिया दिनुहोस !
