वीरगन्ज: पर्सा क्षेत्र नम्बर १ र २ को मतगणना सोमबार दिउँसोदेखि सुरु भएको छ ।
वीरगन्जस्थित ठाकुरराम बहुमुखी क्याम्पसमा दुवै क्षेत्रको प्रतिनिधि सभा सदस्य र प्रदेश सभा सदस्यको एकै पटक मतगणना दिउँसो १.३० बजेदेखि सुरु गरिएको पर्साका मुख्य निर्वाचन अधिकृत विनोद पोखरेलले जानकारी दिए ।
क्याम्पसको मतगणना स्थलमा पर्सा १ र २ को गरी ६ वटा कोठामा मतगणना जारी रहेको उनले बताए ।
पर्सा ३ र ४ को मतगणना पनि केही बेर मै सुरु गर्ने तयारी भइरहेको उनले जानकारी गराए । पर्सा ३ र ४ को मतगणनास्थल पोखरीया नगरपालिका ४ को जिल्ला उच्चांगल रामदेवप्रसाद कलवार माविमा तोकिएको छ ।
पोखरेलका अनुसार, पर्सा जिल्लाका ४ वटै प्रतिनिधि सभा र ८ वटै प्रदेशसभा निर्वाचन क्षेत्र गरी ६९ प्रतिशत मतदान भएको थियो ।
पर्सा जिल्लामा १ लाख ९४ हजार ९ सय ४ पुरुष, १ लाख ५१ हजार ८ महिला र अन्य १६ गरी कुल मतदाता ३ लाख ४५ हजार ९ सय २८ जना रहेकोमा आइतबार भएको निर्वाचनमा २ लाख ३८ हजार ५४ जना मतदाताले मतदान गरेका हुन् ।
जिल्लाका ४ वटै प्रतिनिधि सभा र प्रदेश सभा सदस्य गरी कुल १ सय ६१ जना उम्मेदवार चुनावी प्रतिस्पर्धामा छन् ।
पर्सा क्षेत्र नम्बर १ र २ को मतगणना वीरगन्जस्थित ठाकुरराम बहुमुखी क्याम्पसमा र क्षेत्र नम्बर ३ र ४ को मतगणना पोखरीया स्थित जिल्ला उच्चांगल रामदेव कलवार माविमा गरिनेछ ।
प्रतिक्रिया दिनुहोस !
