धनगढी : नेकपा एमालेका सचिव तथा सुदूरपश्चिम ईञ्चार्ज लेखराज भट्टलाई ज्यान मार्ने धम्की दिइएको छ । मंगलबार बिहान भट्ट घरमा नभएका बेला आएका दुईजनाले मन्त्रीलाई बाहिर निकाल, मारि दिन्छौं, काटिदिन्छौं भन्दै घरभित्र पस्न खोजेको भट्टका स्वकीय सचिव हितेश ओझाले जानकारी दिए ।
कैलाली निर्वाचन क्षेत्र नम्बर ४ बाट प्रतिनिधि सभाका लागि उम्मेदवार रहेका भट्ट मंगलबार बिहान धनगढी उपमहानगरपालिकाकी उपमेयर कन्दकला रानाकी सासूको शवयात्रामा धनगढी थिए । आफन्त बिरामी परेकाले उनकी पत्नी निर्मला पन्त धनगढीको निसर्ग अस्पताल गएका बेला घरमा आएका दुईजनाले भट्टलाई मार्ने धम्की दिएका हुन् ।
घरमा आएर धम्की दिने दुवैजनालाई पक्राउ गरिएको जिल्ला प्रहरी कार्यालय कैलालीका प्रहरी प्रवक्ता प्रहरी नायव उपरीक्षक वेद प्रकाश जोशीले बताए । ‘धनगढी उपमहानगरपालिका वडा नम्बर १४ का शेरबहादुर लामा र गोदावरी नगरपालिका वडा नम्बर २ का दिपेन्द्र विकलाई पक्राउ गरिएको छ । दुवैजनाले आफू पूर्वलडाकु भएको बयान दिएका छन्,' प्रवक्ता जोशीले भने ।
प्रहरीले दुवैजना मदिरा सेवन गरेको अवस्थामा पक्राउ परेका हुन् । पक्राउ परेका दुवैजनालाई ईलाका प्रहरी कार्यालय मालाखेतीमा राखिएको छ । यसअघि भट्टको घरमा सशस्त्र प्रहरीले सुरक्षा दिँदै आएको थियो। तर, चुनावका बेला उनको घरको सशस्त्र प्रहरी फिर्ता गएको थियो ।
यो घटना पछि ईलाका प्रहरी कार्यालय मालाखेतीबाट थप सुरक्षा तैनाथ गरिएको प्रहरी प्रवक्ता जोशीले बताए ।
प्रतिक्रिया दिनुहोस !
