सन्धिखर्क : अर्घाखाँचीको शितगंगा नगरपालिका-१० बहखोरकी राधा थापा सधैं जस्तै आइतबार बिहान पनि दूध लिन गइन्।
बिहानै उठेर नजिकैको डुम्रीपाटा गाउँमा दूध लिन जाने उनको दैनिकी थियो। बहखोरमा सानो होटल व्यवसाय गर्दै आएकी थापाले होटलमा आएका पाहुना तथा ग्राहकलाई चिया खुवाउन भनेर दूध लिन गएकी थापा बिहान ९ बजेसम्म पसल आइपुगिनन्।
दूध लिएर नआएपछि किन ढिला भयो भनेर आफन्तले फोन गरे। दूध लिन जाने स्थानमा नगएको भन्ने थाहा पाएपछि स्थानीय र आफन्तले खोजी गर्न थाले। खोजी गर्दै जादा नजिकैको खोल्सीमा थापा मृत भेटिइन्।
स्थानीयले तुरुन्तै प्रहरीलाई खबर गरे। प्रहरी आएर घटना हेर्दा हत्या भएको हुन सक्ने आशंका गरेपछि प्रहरी र स्थानीयले हत्याराको खोजी गर्न थाले।
खोजी गर्दै जाँदा थापालाई हत्या गरी भागेका भारतीय नागरिक २३ वर्षीय सुसान्त सिंहलाई प्रहरीले पक्राउ गर्यो।
हत्या गरेर थापाले लगाएका गरगहना लुटेर भाग्दै गरेका भारतीय नागरिक सिंहलाई शितगंगा नगरपालिका-११ को मुन्द्रीबासको जंगलबाट प्रहरीले पक्राउ गर्न सफल भएको हो।
सिंहले थापाको शरीरबाट कानमा लगाउने मडहरी, सिक्री लगायतका सुनका गरगहना लुटेर लगेको स्थानीय माधव पौडेलले बताए।
पक्राउ परेका सिंहले खोल्सीमा लुकेर बसी हसिया र ढुंगाले हानेर हत्या गरेको प्रहरी समक्ष स्वीकार गरेका छन्।
उनलाई जिल्ला अदालत अर्घाखाँचीबाट सात दिनको म्याद थप गरी अनुसन्धान भइरहेको जिल्ला प्रहरी कार्यालयका प्रमुख प्रहरी नायव उपरीक्षक मुकुन्द प्रसाद रिजालले बताए।
प्रतिक्रिया दिनुहोस !
