सगरमाथा क्षेत्र जोडने सडक कालोपत्रेका लागि ६० करोडको टेण्डर आह्वान
पुष २७, २०७९ बुधबार १०:२८:०
सोलुखुम्बु : सोलुखुम्बुको तल्लो क्षेत्रबाट खुम्बु क्षेत्र जोड्ने सडक कालोपत्रेका लागि ६० करोड बराबरको टेण्डर आह्वान भएको छ ।
जिल्लाको माप्यदुधकोशी गाउँपालिकाबाट खुम्बु पासाङ लहामु गाउँपालिका जोड्ने सडकका लागि निर्वाचन क्षेत्र रणनीतिक सडक कार्यक्रमअन्तरगतको परियोजनाका लागि आज (बुधबार) टेण्डर आह्वान गरिएको हो ।
जिल्लाको पर्यटन विकासका लागि तल्लो सोलुलाई सगरमाथा क्षेत्रमा पर्ने खुम्बुसम्म सडक सञ्जालले जोड्ने उद्देश्यका साथ तत्कालिन संघीय सांसद हेमकुमार राई ‘शूरवीर’ले २०७६ साल फाल्गुन २५ गतेको दिन सल्लेरी–सिलगुडीडाडाँ–काँकु–बासा–ओर्लाङ्गघाट–जुभिङ–खरिखोला–लुक्ला चौरीखर्क सडक खण्ड कालोपत्रेलाई निर्वाचन क्षेत्र रणनीतिक सडक कार्यक्रममा समावेश गर्न भौतिक पूर्वाधार मन्त्रालयमा सिफारिस गरेका थिए ।
सोही सिफारिसको आधारमा छनोट भएको उक्त सडक कालोपत्रेका लागि टेण्डर प्रक्रिया अघिल्लो वर्ष नै अघि बढ्नुपर्ने भएपनि प्राविधिक कारणले रोकिएको थियो । यो टेण्डर आह्वानसँगै लामो समयदेखिको चर्चा हुँदै आएको सो सडक खण्डको कालोपत्रे हुने निश्चित भएको छ ।
प्रतिक्रिया दिनुहोस !
