भोजपुर : गाउँपालिकाको केन्द्र सारेको भन्दै अरूण गाउँपालिकामा स्थानीयले जनप्रतिनिधिलाई तालाबन्दी गरेका छन्। गाउँपालिकाको केन्द्र तोकिएको जग्गा छनौट गर्ने निर्णयमा विवाद भएपछि गाउँपालिका अध्यक्ष शालिकराम खत्री, उपाध्यक्ष विनिता ढकाललगायतका सदस्यलाई स्थानीयले गाउँपालिकाको कार्यालयमै थुनेका हुन्।
गाउँ कार्यपालिकाको बैठकमा सर्वसम्मत निर्णय हुन नसकेपछि बहुमतको आधारमा गाउँपालिकाको कार्यालय वडा नं ३, प्याउलीस्थित मरेङडाँडामा राखिने निर्णय हुँदा स्थानीयबासी आक्रोशित बनेका थिए। हाल रहेको गाउँपालिकको केन्द्र प्याउलीबजारदेखि २ किलोमिटर दूरीमा रहेको उक्त स्थानमा जग्गा छनौट गर्ने निर्णयमा विवाद बढेपछि स्थानीयले आक्रोशित हुँदै पालिकाका जनप्रतिनिधिलाई कार्यालयमै तालाबन्दी गरेका थिए।
जग्गा छनौटका लागि कार्यपालिकाले बहुमतमा निर्णय गरेको विरोध गर्दै स्थानीयले आफुहरूलाई तालाबन्दी गरेको गाउँपालिका उपाध्यक्ष विनिता ढकालले बताइन्। ‘पालिकाको कार्यालयका लागि जग्गा छनौट गर्न बसेको बैठकमा अधिकांशले मरेङडाँडामा राख्ने निर्णय गरेतापनि स्थानीय बजारबासी आक्रोशित भएर विरोध गर्दै हामीलाई कार्यालयभित्रै तालाबन्दी गरिदिए।’ उपाध्यक्ष ढकालले सुनाइन्।
गाउँपालिकाका जनप्रतिनिधिहरूले मनोमानी ढंगले स्थानीयबासीको हितविपरीत गरेको निर्णयप्रति आपत्ती स्वरुप तालाबन्दी गरिएको स्थानीय पूर्ण श्रेष्ठले बताए। उनले भने, ‘गाउँपालिकाका जनप्रतिनिधिहरू बाहिरी प्रभाव र दबाबमा परेर गलत निर्णय गरेका कारण विरोध स्वरूप तालाबन्दी गरेका हौं।’ गाउँपालिकाको निर्णय नसच्चिएसम्म विरोधका कार्यक्रमहरू जारी रहने उनले बताए। गाउँपालिकाको निर्णय स्थानीयको हितसंगत हुनुपर्ने स्थानीयको माग छ।
जनप्रतिनिधिलाई तालाबन्दी भएपछि गाउँपालिकामा सरोकारवाला र सुरक्षाकर्मीबीचच छलफल भइरहेको छ। गाउँपालिकाको कार्यालय स्थानीय प्याउलीबजारमा भाडामा रहँदै आएको छ।
प्रतिक्रिया दिनुहोस !
