जनकपुरधाम : क्षिरेश्वरनाथ नगरपालिकास्थित ईलाका प्रहरी कार्यालय महेन्द्रनगरको थुनुवा कक्षबाट ६ जना फरार भएका छन् । विभिन्न अपराधी घटनामा पक्राउ परेका ७ जनामध्ये विनोदकुमार शर्मा,अमित मण्डल, रोशन यादव , हरिवित सिंह, रोशन महतो र शंकर सिंह फरार भएका हुन्।
ईलाका प्रहरी कार्यालयको थुनुवा कक्षबाट आइतबार राति करिब १ बजे थुनुवा कक्षभित्र रहेको टोइलेटमा लागेको स्टिलको चौकटले देवाल फोरेर फरार भएको प्रहरीको भनाई छ । फरार भएकाहरुलाई सोमबार बिहानैदेखि डग टोली परिचालन गरी खोजी जारी रहेको छ।
जिल्ला प्रहरी कार्यालय धनुषाका प्रवक्ता डीएसपी प्रदीपबहादुर क्षेत्रीका अनुसार दुई जना हात हतियार, दुई जना लागुऔषध र अभद्र व्यवहारका दुई जना गरी ६ जना थुनुवा राति हिरासत तोडेर फरार भएका हुन्। उनीहरुको तीव्र खोजी कार्य जारी रहेको क्षेत्रीले बताए।
ईलाका प्रहरीको भवन पुरानो रहेको छ । हिरासत भएको भाग कमजोर भएको कारण फोडेर उनीहरू भाग्न सफल भएको प्रहरीको भनाइ छ ‘प्रहरी डिउटीमै थिए । अगाडिबाट भित्रको हिरासतभित्र देखिंदैन । भवन धेरै पुरानो रहेकाले पछाडिबाट फोडेर अभियुक्त भागेका हुन्’, डीएसपी क्षेत्रीले भने ।
प्रतिक्रिया दिनुहोस !
