जनकपुरधाम : इलाका प्रहरी कार्यालय महेन्द्रनगरको हिरासत कक्षबाट फरार भएका ६ जना थुनुवाहरूमध्ये थप एक जनालाई प्रहरीले पक्राउ गरेको छ।
पक्राउ पर्नेमा क्षीरेश्वरनाथ नगरपालिका-२ का २५ वर्षीय अमित मण्डल रहेका छन्। इलाका प्रहरी कार्यालय महेन्द्रनगरको हिरासत कक्षबाट भित्ता फोडेर सोमबार बिहान ६ जना थुनुवा फरार भएका थिए।
हिरासत कक्षबाटै थुनुवाहरू फरार भएपछि जिल्ला प्रहरी कार्यालय धनुषा र मधेस प्रहरी कार्यालयको संयुक्त टोलीले सर्च अपरेशन टोली खटाएर खोजतलास तीव्र पारेको छ। सो टोलीले फरार थुनुवामध्ये मण्डललाई पक्राउ गर्न सफल भएको हो।
मण्डलमाथि सार्वजनिक शान्ति विरुद्धको अपराध मुद्दा चलिरहेको छ। यसअघि प्रहरीले सोमबार साँझ मिथिला नगरपालिका-६ का २८ वर्षीय रोशन महतोलाई पक्राउ गरेको थियो।
उनलाई हतियारसहित प्रहरीले गत शनिबार मात्रै पक्राउ गरेर सार्वजनिक गरेको थियो। यता फरार रहेका बाँकी ४ जनाको खोज तलास तीव्र रूपमा भइरहेको प्रहरीले जनाएको छ।
प्रतिक्रिया दिनुहोस !
