भक्तपुरका विद्यालयमा स्यानिटेरी प्याड वितरण

भक्तपुर:भक्तपुर नगरका विद्यालयमा दिवा खाजा र स्यानिटेरी प्याड वितरण गर्दै आएको नगरपालिकाले जनाएको छ । १३ औं नगरसभा उद्घाटन कार्यक्रममा नगर प्रमुख सुनिल प्रजापतिले यस्तो बताएका हुन् । 

उनले भक्तपुर नगरपालिकाबाट दुईवटा इन्जिनियरिङ कलेजसहित ८ वटा शैक्षिक संस्थाहरू सञ्चालन गरी देशभरीकै विद्यार्थीहरूलाई कम शुल्कमा गुणस्तरीय शिक्षा प्रदान गर्दै आएको बताए । 

यसवर्ष पूर्वाञ्चल विश्वविद्यालयबाट ख्वप कलेज अफ ल सञ्चालनको स्वीकृति प्राप्त गरेको जानकारी उनले गराए । स्वीकृत बमोजिम कूल ६० सिटमा भर्ना लिई बीएएलएलबीको कक्षा पनि शुरू गरिसकेको उनले जनाए । उनले भने,'अब भक्तपुरका विद्यार्थीका लागि कानुन पढ्न जिल्ला बाहिर जान पर्दैन।'

नगरपालिकाद्वारा सञ्चालित कलेजहरुले उत्कृष्ट नतिजा दिन सफल भएको र अब कानुनमा पनि उत्कृष्ट परिणामको अपेक्षा उनले गरे । नगरक्षेत्रभित्र सञ्चालनमा रहेका सामुदायिक विद्यालयको भौतिक सुधारको लागि यो वर्ष ३१ वटा विद्यालयलाई प्रतिविद्यालय वार्षिक ५० हजारका दरले अनुदान,१ वटा विद्यालयलाई पुस्तकालय स्थापना तथा व्यवस्थापन,किताब खरिद र ई—पुस्तकालय समेत व्यवस्था गर्न ६ लाख ५० हजार विज्ञान प्रयोगशाला निर्माणको लागि एउटा विद्यालयलाई ६लाख ५० हजार वितरण गर्ने तयारी गरेको उनले बताए । सामुदायिक विद्यालय सुधार गरी शैक्षिकस्तर वृद्धिका लागि भक्तपुर नगरपालिका निरन्तर लागिरहेको उनको भनाइ थियो ।  

विद्यालयको शैक्षिकस्तर सुधार र आन्तरिक प्रतिस्पर्धाबाट शैक्षिक गुणस्तरमा अभिवृद्धि ल्याउन उत्कृष्ट सिकाइ उपलब्धी भएको विद्यालयलाई प्रोत्साहन अनुदान प्रतिविद्यालय २ लाख, नमूना विद्यालय सेवा अनुबन्धका आधारमा नियुक्त भएका प्रअर शिक्षकको लागि प्रोत्साहन अनुदान प्रतिविद्यालय २ लाख र नमूना विद्यालयको शैक्षिक तथा व्यवस्थापकीय योजना कार्यान्वयनको लागि कार्य सम्पादनमा आधारित अनुदान प्रतिविद्यालय ३० लाखदेखि ५० लाखसम्म उपलब्ध गराउने तयारी गरेको उनले जनाए । 

नगर क्षेत्रका विद्यालयस्तरीय विद्यार्थीहरूको शैक्षिक गुणस्तर कायम गर्न यस वर्षदेखि एसईई तयारी अभ्यास परीक्षा (टेष्ट परीक्षा) र गत वर्षदेखि कक्षा ५ को नगरस्तरीय वार्षिक परीक्षा सञ्चालन गरेको र कक्षा ८ को नगरस्तरीय परीक्षालाई निरन्तरता दिँदै आएको उनले जनाए ।

नगरसभाको उदघाटन नेपाल मजदुर किसान पार्टीका अध्यक्ष नारायणमान विजुक्छेले गरेका थिए ।