पक्राउ परेकाको साथबाट तीन किलो गाँजा र एउटा भारतीय मोटरसाइकल पनि सशस्त्र प्रहरीले नियन्त्रणमा लिएको छ ।
विराटनगर : विराटनगरबाट लागूऔषध गाँजासहित दुई भारतीय नागरिकलाई प्रहरीले पक्राउ गरेको छ ।
पक्राउ परेकाको साथबाट तीन किलो गाँजा र एउटा भारतीय मोटरसाइकल पनि सशस्त्र प्रहरीले नियन्त्रणमा लिएको छ । विराटनगर महानगरपालिका–१५ स्थित रानी बसपार्कबाटबिहीबार राति भारत अररिया दक्षिण महेश्वरीका २३ वर्षीय सुनीलकुमार साह र अररिया विसनपुरका ३९ वर्षीय प्रमोद यादव पक्राउ परेका हुन् । बीओपी (बोर्डर आउट पोस्ट) रानीबाट खटिएको सशस्त्र प्रहरी नायव निरीक्षक थानबहादुर खड्का नेतृत्वको टोलीले राति ८ बजेतिर उनीहरुलाई पक्राउ गरेको हो ।
पैदल नै भारतको जोगवनीतिर जाँदै गरेका साहलाई सुरूमा सशस्त्रले नियन्त्रणमा लिएको थियो । खानतलासी गर्दा उनले बोकेको झोलाबाट ३ किलो गाँजा बरामद भएको सशस्त्र प्रहरी बल मोरङका प्रमुख एसपी तीर्थ थापाले जानकारी दिए । उनका अनुसार सोधपुछका क्रममा साहले उक्त गाँजा आफूलाई प्रमोद यादवले दिएको र भारततिर लैजान भनेको बताएका थिए ।
त्यसलगत्तै खोजतलास गरेर यादवलाई बीआर ३८ सी २६०६ नम्बरको मोटरसाइकलसहित विराटनगर–१५ बाटै पक्राउ गरिएको थापाको भनाइ छ । उनले पक्राउ परेकाहरुको साथबाट २ वटा भारतीय आधार कार्ड र नेपाली १ हजार २ सय १० रूपैयाँसमेत बरामद भएको बताए ।
एसपी थापाका अनुसार पक्राउ परेका दुवै जनालाई बरामद भएको गाँजा तथा नियन्त्रणमा लिएको मोटरसाइकलसहित आवश्यक अनुसन्धान र कारबाहीका लागि इलाका प्रहरी कार्यालय रानीमा बुझाइएको छ ।
प्रतिक्रिया दिनुहोस !
