भक्तपुर : भक्तपुर नगरपालिकाको आयोजनामा भएको अन्तरनगर पुरुष खो खोको उपाधिका लागि फाइलन खेल मंगलबार ठाकुरबाबा र कीर्तिपुर नगरपालिकाबीच हुने भएको छ । यस्तै तेश्रो स्थानका लागि धनगढी उपमहानगरपालिका र आयोजक भक्तपुर नगरपालिकाबीच भीडन्त हुने भएको छ ।
सोमबार भएको सेमिफाइन खेलमा धनगढी उपमहानगरपालिकालाई हराउँदै ठाकुरबाबा नगरपालिका विजयी भएको थियो । साथै भक्तपुर नगरपालिका वीलाई हराउँदै कीर्तिपुर नगरपालिकाले विजय यात्रा तय गरेको थियो ।
मंगलबार पहिलो खेल तेश्रो स्थानका लागि हुने छ भने अन्तिम खेल पहिलो स्थानका लागि हुने जनाइएको छ । विजयी टोलीलाई सांसद प्रेम सुवालबाट पुरस्कार तथा प्रमाणपत्र वितरण गर्ने कार्यक्रम तय गरिएको छ ।
प्रतियोगितामा प्रथम हुने टिमलाई १ लाख ५० हजार, दोस्रो हुनेलाई १ लाख र तेस्रो हुनेलाई ५० हजार नगद पुरस्कारको व्यवस्था गरिएको छ । साथै प्रत्येक खेलमा सहभागी नगरपालिकालाई नगद ५ हजार पुरस्कारको व्यवस्था गरिएको छ । खेल महेश्वरी खेल मैदान भक्तपुरमा हुने छ ।
भक्तपुर नगरपालिकाले प्रत्येक वर्ष अन्तर नगर खेलकुद प्रतियोगिता गर्दै आइरहेको छ । यस अन्तर्गत पहिलो वर्ष भलिबल, दोस्रो वर्ष कराँते, तेस्रो वर्ष एथ्लेटिक्स र चौथो वर्ष बुद्धिचाल प्रतियोगिता सफलताका साथ सम्पन्न गरेको थियो ।
त्यस अनुसार यो वर्ष खो खो प्रतियोगिता भएको हो । प्रतियोगिता फागुन ५ गतेदेखि सुरु भएको थियो । यसअघि प्रतियोगिताका लागि नगर प्रमुख सुनिल प्रजापतिको संयोजकत्वमा १३५ सदस्यीय मूल समिति र ११ वटा उपसमितिहरू गठन गरिएका थिए । प्रतियोगिताको उद्घाटन सहिद स्मृति खेलमैदानमा नेपाल मजदुर किसान पार्टीका केन्द्रीय अध्यक्ष नारायणमान बिजुक्छेले गरेका थिए ।
प्रतिक्रिया दिनुहोस !
