महिलाको सुरक्षा,सम्मान र रोजगारी साझा अभियान : प्रदेश प्रमुख परियार

वीरेन्द्रनगर : कर्णाली प्रदेशका प्रमुख तिलक परियारले महिलाको सुरक्षा,सम्मान र रोजगारी अहिलेको प्रमुख प्राथमिकता रहेको बताएका छन् । ११३ औं अन्तर्राष्ट्रिय नारी दिवसका अवसरमा शुभकामना सन्देश दिँदै प्रदेश प्रमुख परियारले सम्मान र रोजगारीलाई हाँसिल गर्न महिलाको आर्थिक,सामाजिक सांस्कृतिक तथा व्यवस्थापकीय रुपान्तरण आवश्यक रहेको कुरालाई मनन् गर्दै सुरक्षा,सम्मान र रोजगारीलाई साझा अभियानको रुपमा अगाडि बढाउनुपर्ने आवश्यकता रहेको बताएका हुन् । 

उनले नेपाली जनताको महान जनयुद्ध र जनआन्दोलन आन्दोलनको प्रतिफलस्वरुप महिला सशक्तिकरणको क्षेत्रमा राजनीतिक रुपमा प्राप्त गरेका उपलब्धीहरू विश्व महिला आन्दोलनकै लागि प्रेरक मानिएको बताएका छन् । 

त्यस्तै नेपालको कानुनले महिलालाई ३३ प्रतिशत आरक्षणको व्यवस्था पनि गरेको छ । उनले भनेका छन्, 'नेपालको संविधानले समेत मौलिक हकको धारा ३८ मा महिला माथि हुने अत्याचार, शोषण, दमन र हिंसा जस्ता लैंगिक विभेद र अमानवीय व्यवहारहरू अन्त्य गरी पुरुष र नारी बीच समानताको प्रत्याभूति गर्न महिलाको हक सुनिश्चित गरेको छ । '

नारी दिवसले नेपालको संविधानले गरेको व्यवस्था र अन्तर्राष्ट्रिय मञ्चहरुमा नेपालले व्यक्त गरेका प्रतिबद्धताहरु पूरा गर्न हौसला प्रदान गर्ने विश्वास लिएको बताउदै प्रदेश प्रमुख परियारले महिलाविरुद्ध हुने सबै प्रकारका हिंसा, विभेद, उत्पीडन एवं समाजमा विद्यमान विकृति प्रथा र परम्परालाई निर्मुल गर्दै समानता र न्याय सुनिश्चत गर्न सबैले ध्यान दिनुपर्ने बताएका छन् । 

यस्तै अन्तर्राष्ट्रिय नारी दिवसले लैंगिक समानताका विषयलाई आत्मसात् गर्न सहयोग पुग्ने विश्वास लिएको उल्लेख गरेका छन् । संयुक्त राष्ट्रसङ्घले सन् २०३० सम्म हासिल गर्ने गरी निर्धारण गरेको दिगो विकासका लक्ष्यहरु लैंगिक समानता कायम गर्ने,असमानता घटाउने,शान्ति कायम गर्ने र न्यायमा पहुच पुर्‍याउने जस्ता विषयहरू महिलाको हित संरक्षणमा केन्द्रित रहेको प्रदेश प्रमुख परियारको शुभकामना सन्देशमा उल्लेख छ ।