विराटनगर : भद्रगोल आयोजनाका कारण विराटनगरमा बिहीबारबाट सुरु भएको सातौं संस्करणको रात्रीकालीन विराट गोल्डकपमा दर्शकको उपस्थिति न्यून देखिएको छ ।
आवश्यक समन्वय र व्यवस्थापनको अभावमा विराटनगरको ऐतिहासिकतासँग जोडिएको गोल्डकपमा न्यून दर्शक सहभागी भएका हुन् । कुल ८ हजार क्षमताको शहिद रङ्गशालामा बिहीबारको उद्घाटन खेलमा करिब १५ सय दर्शक मात्र सहभागी भएका हुन् । बिहीबार भएको विराटनगर सिटी फुटबल क्लब र नेपाल पुलिस क्लबको खेलमा रङ्शालाको दर्शक बस्ने प्याराफिट पुरै खाली देखिएको हो । सहभागी भएका दर्शकहरु पनि फ्री पास लिएर आएको आयोजकले जनाएको छ । टिकट बिक्री भने एकदमै न्यून मात्रामा भएको आयोजक संस्थाका एक सदस्यले बताए । नाम नखुलाउने शर्तमा उनले भने, ‘आवश्यक प्रचारप्रसारको अभावमा धेरैले गोल्डकप हुँदैछ भन्ने थाहा नै पाएनन् ।’
गोल्डकप ट्रष्टभित्रको आन्तरिक विवादका कारण आयोजक समितिले सबै पक्षलाई समेटन नसक्दा आयोजना भद्रगोल बनेको सरोकारवालाहरुले बताएका छन् । सामाजिक सञ्जालमा सरोकारवालाहरुले चर्को असन्तुष्टि समेत व्यक्त गरेका छन् । विराटनगरका मेयर नागेश कोईरालाकोे संयोजकत्वमा पहिलोपटक हुन लागेको गोल्डकपले विराटनगरको ऐतिहासिकतालाई जोगाउन नसक्ने देखिएको कोशी प्रदेश खेलकुद विकास बोर्डका सदस्य प्रदीप भगत थारुले बताए । उनले भने, ‘युवाहरुलाई नयाँ प्रविधि अपनाउन खोजेका हुन् । तर, केही कमजोरी भए । समयमै सच्याउनुप¥थ्यो ।’
प्रदेश खेलकुद विकास बोर्डले गोल्डकप आयोजनाका लागि १२ लाख बजेट विनियोजन गरेको छ । तर, आवश्यक प्रचारप्रसारको अभावमा विराटनगरबासीले गोल्डकप बारे जानकारी समेत पाएका छैनन् । स्थानीय सञ्चारमाध्यममा विज्ञापन र प्रचारप्रसार नगर्दा स्थानीयलाई गोल्डकपबारे अत्तोपत्तो छैन् । स्थानीय मञ्जित राजवंशीले भने, ‘यसअघिका वर्षहरुमा बिहानदेखि बेलुकासम्म जताततै गोल्डकप मात्रै सुन्न पाईन्थ्यो । यसपटक केही थाहा छैन् । कहिलेदेखि हो ? कतिबजे हो ? केही जानकारी छैन् ।’
गोल्डकपको हुुँदैछ भन्ने थाहा पाएका विराटनगरबासी पनि फाईनल खेल मात्र हेर्न जाने विचारमा छन् । अन्य वर्षहरुको तुलनामा यसपटकको टिकट दर ह्वातै बढाईएको हुनाले फाईनल चरणको खेल मात्र हेर्न जाने उनीहरुको तर्क छ । गोल्डकपको तयारीबारे जानकारी दिन सोमबार विराटनगरमा आयोजक समितिले पत्रकार सम्मेलन गरेको थियो । चैत्र १७ गतेसम्म चल्ने गोल्डकपमा घरेलुसहित नेपाली र विदेशी गरी कुल ८ वटा टिमले सहभागिता जनाउने आयोजकले जनाएको थियो । आयोजकले प्रतियोगितामा सहभागी हुने दर्शकले क्वाटरफाईनल खेलसम्म २०० रुपैयाँ प्रतिगोटा र त्यसपछि खल्ती एपमार्फत् रु. ४०० र रङ्गशालामै रु. ५०० का दरले टिकट खरिद गर्न पाईने जनाएको थियो । तर, टिकट दर महङ्गो भएको भन्दै स्थानीयले प्रतियोगिता नै हेर्न नजाने बताएका छन् । यसपटकको गोल्डकपमा विद्यार्थीहरुका लागि समेत आवश्यक छुट तथा सहुलियतको व्यवस्था नगरिएको विराटनगर–१२ निवासी मिकेन श्रेष्ठले बताए । ‘गोल्डकप आयोजना गर्नुभन्दा त बरु अझै एकपटक एक्स्पो लगाईदिए हुन्थ्यो । कम्तीमा टिकट त सस्तो थियो,’ उनले भने, ‘यसपटकको गोल्डकप खेल क्षेत्रको विकास र विराटनगरको ऐतिहासिकता संरक्षणको साटो कमाउने बिषयतर्फ केन्द्रित देखिन्छ ।’
यसपटकको गोल्डकपले स्थानीय सञ्चारमाध्यमसँग समेत आवश्यक समन्वय गर्ने प्रयास नगरेको भन्दै पत्रकारहरुले पनि गुनासो पोखेका छन् । औपचारिक कार्यक्रमको सामान्य जानकारी पनि सञ्चारमाध्यममा पुगेको छैन् । गोल्डकप विराटनगरमा आयोजना गरेर व्यवस्थापनका अन्य सबैचिच केन्द्रिकृत गर्ने प्रयास गरिएको भन्दै पत्रकारहरुले विरोध गरेका छन् । विज्ञापनदेखि पास वितरणसम्म स्थानीय सञ्चारमाध्यमलाई उपेक्षा गर्न खोजिएको आरोप पत्रकारहरुको छ । सामाजिक सञ्जालका पत्रकारहरुको चर्को असन्तुष्टि सजिलै देख्न सकिन्छ । प्रेस चौतारी मोरङले बिहीबार एक विज्ञप्ति जारी गर्दै गोल्डकप आयोजक समितिले पत्रकारिता क्षेत्रलाई उपेक्षा गर्न खोजेको भन्दै आपत्ति समेत जनाएको छ । चौतारीले स्थानीय सञ्चारमाध्यम र पत्रकारहरुप्रति सम्मानजनक व्यवहार गर्नुपर्ने भन्दै आयोजक समितिको ध्यानाकर्षण समेत गराएको छ ।
प्रतियोगिताबारे चौतर्फी आलोचना भएपछि अन्नपूर्णसँग कुुरा गर्दै विराट गोल्डकपका सह–संयोजक सुभाषिश कोईरालाले व्यवस्थापनमा केही कमजोरी भएको भन्दै त्यसलाई सुधार गर्ने प्रयास भईरहेको बताए । उनले विगतका वर्षहरुभन्दा केही नयाँ र फरक गर्ने प्रयास गरिएकोमा ट्रष्टभित्रकै असहयोगका कारण समस्या उत्पन्न भएको जिकिर गरे । उनले भने, ‘जे भयो भईहाल्यो । हामी मिलाउँदैछौं ।’
विराटनगरको शहिद रङ्गशालामा बिहीबारबाट सुरु भएको गोल्डकपको उद्घाटन कोशी प्रदेशका मुख्यमन्त्री हिक्मत कार्कीले गरेका छन् । उद्घाटन पश्चात कार्यक्रमलाई सम्बोधन गर्दै उनले विराटनगरमा अन्तराष्ट्रियस्तरको स्टेडियम निमार्ण गर्न आगामी वर्षका लागि आवश्यक बजेट विनियोजन गरिएको बताए ।
गोल्डकपमा भने ३ विभागीयसहित नेपालका ६ र विदेशका २ वटा टिमको सहभागिता रहने जनाईएको छ । विराटनगरमा वि.सं. २०१८ सालबाट महेन्द्र गोल्डकपका नाममा फुटबल प्रतियोगिता आयोजना हुँदै आएको छ । महेन्द्र गोल्डकपका नाममा २७ औँ संस्करणसम्म प्रतियोगिता आयोजना भएपछि २०६८ सालबाट नाम परिवर्तन गरेर गोल्डकप आयोजना हुँदै आएको हो ।
प्रतिक्रिया दिनुहोस !
