उद्योग वाणिज्य महासंघ निर्वाचन
वरिष्ठ उपाध्यक्षको प्रतिष्पर्धाबाट रामचन्द्र संघई बाहिरिए, अञ्जन र उमेशलाल भीड्ने, २ बजेदेखि निर्वाचन
चैत ३०, २०७९ बिहीबार १२:३०:१२
काठमाडौं : नेपाल उद्योग वाणिज्य महासंघको विधानअनुसार उम्मेदवारले ५० प्रतिशत मतभार कटाउन नसकेपछि दोस्रो चरणको निर्वाचन हुने भएको छ । दोस्रो चरणको निर्वाचनका लागि उमेशलाल श्रेष्ठ र अन्जन श्रेष्ठबीच प्रतिष्पर्धा हुने भएको छ । अर्का प्रतिष्पर्धी रामचन्द्र संघई प्रतिष्पर्धाबाट बाहिरिएका छन्। निर्वाचन आज दिउँसो २ बजेबाट सुरू हुनेछ।
मुख्य निर्वाचन अधिकृत लीलामणि पौडेलले दोस्रो चरणको मतदान बिहीबाहार दिउँसो हुने जानकारी दिएका छन्। जिल्ला नगरतर्फ १ सय १७ मत खसेकोमा सघंईले ३९ मत,उमेशलाल श्रेष्ठले २८ र अञ्जन श्रेष्ठले ४७ मत मात्रै प्राप्त गरे।
वस्तुगततर्फ खसेको कूल १ सय २३ मतमा सघंईले १२ मत,अञ्जनले ४१ मत र उमेशलाल श्रेष्ठले ६९ मत प्राप्त गरे। वस्तुगत तर्फबाट सर्वाधिक मत पाएसँगै उमेशलाल दोस्रो चरणमा जाने अवसर पाएका हुन् । सुरुको मत गणनामा उनी पछि परेका थिए ।
एसोसिएटतर्फ संघईले ६ सय १३ मत ल्याए । अञ्जनले ५ सय ७३ र उमेश श्रेष्ठले ४ सय २६ मत प्राप्त गरे। वरिष्ठ उपाध्यक्षले जिल्ला नगरको मतभार ५० प्रतिशत, एसोसिएट ३० प्रतिशत र वस्तुगतको २० प्रतिशत मताभार कटाउनुपर्ने महासंघको विधानमा उल्लेख छ।
महासंघको इतिहासमा त्रिपक्षीय भिडन्त पहिलोपटक भएको हो । महासंघमा यसअघि दुई पक्षीयबीच मात्रै चुनाव हुने गरेको थियो । श्रेष्ठद्वय प्रतिष्पर्धा हुँदा संघई पक्षले कता भोट हाल्छ भन्ने विषयले नेपाल प्रज्ञा प्रतिष्ठान तातेको छ ।
सुरूमा अग्रता लिइरहेका संघइ विधानअनुसार मतभार नकटेपछि बाहिरिएका हुन् । निर्वाचनमा १ हजार ९ सय ८८ मतदाता छन् ।
प्रतिक्रिया दिनुहोस !
