सोलुखुम्बु : नयाँ वर्ष २०८० को पहिलो दिन बैशाख १ गते सोलखुम्बु सदरमुकाम सल्लेरी बजार सुनसान बनेको छ । सल्लेरी बजार क्षेत्रका स्थानीय, पेशा व्यवसाय गर्ने तथा कर्मचारी नयाँ वर्ष मनाउन अन्यत्र गएसँगै सल्लेरी बजार सुनसान बनेको हो ।
आज शुक्रबार सल्लेरी तथा फाप्लु क्षेत्रका होटल पसलदेखि अधिकांश घरको ढोकामा ताला लागेको छ भने नयाँ वर्षको अवसरमा सरकारले सार्वजनिक विदा दिएकाले सबै कार्यालय पनि बन्द छन् ।
जसका कारण सधैंजसो नागरिकको चहल पहल हुने सदरमुकाम क्षेत्र आज सुनसान छ । सल्लेरी,फाप्लु,नयाँ बजार क्षेत्र पुरै सुनसान छ भने जिल्लाको पर्यटकीय स्थलहरू पत्ताले,पिकेडाँडा, थुक्तेन्छोलिङ, रातनागी,च्याल्सा,लोदिङ मन्दिर,बेनी,गार्मालगायतका क्षेत्रहरू पर्यटकले भरिभराउ बनेका छन् ।
आजको दिन परिवार,आफन्तजन तथा साथीभाइहरू एक आपसमा भेटघाट गरी रमाइलो गर्ने तथा मनोरञ्जनमा समय बिताउने भएकाले जिल्लाको पर्यटकीय स्थल भरिभराउ बनेका हुन् । साथै कतिपय व्यक्तिहरू वनभोज तथा सहभोजका लागि गाडी नै रिजर्भ गरेर भ्रमणमा निस्किएका छन् ।
आपसी सद्भाव तथा भाइचराका लागि पनि आफूहरू वनभोजमा आएको वित्तीय कर्मचारी मञ्ज सोलुखुम्बु अध्यक्ष खगेन्द्र बनले बताए । यता पत्ताले डाँडामा आज हजारौको संख्यामा पर्यटकहरू अवलोकनका लागि पुगेका छन् भने बिहानैदेखि मौसम अनुकूल हुँदा त्यहाँ पुगेका पर्यटक फोटो खिच्नमा तथा दृष्य अवलोकनमा व्यस्त बनेको पत्तालेबाट सन्दिप नेपालीले जानकारी दिए ।
नयाँ वर्षको अवसरमा जिल्लाको विभिन्न स्थानको तिर्थस्थलमा मेला समेत लागेकाले त्यहाँ पुग्ने भक्तजनको संख्या समेत उल्लेख्य रहेको सर्वसाधरणले बताएका छन् । पत्ताले क्षेत्रको गौरी टाप धार्मिक स्थलमा लागेको मेलामा सयौंको संख्यामा अवलोकनकर्ता पुगेको धार्मिक स्थलका संरक्षक लौरेश्वर बाबाले बताए ।
यस्तै, सोलुदुधकुण्ड नगरपालिका ३ तामाखानी लोदिङमा ज्वालामाई मन्दिरमा पनि यस वर्ष नयाँ वर्षको अवसरमा मेला लागेको छ । नयाँ वर्षको अघिल्लो दिनबाट सुरु भएको मेलामा सोलुखुम्बुको विभिन्न स्थानसहित छिमेकी जिल्लाबाट समेत अवलोकनकर्ता तथा भक्तजन पुगेको मेला प्रचारप्रसार समितिका संयोजक सन्तबहादुर मगर (र्याविट)ले जानकारी दिए ।
प्रतिक्रिया दिनुहोस !
